بلوچستان میں نامعلوم افراد کی فائرنگ، کراچی کا رہائشی موبائل ڈیلر جاں بحق
کراچی(بولونیوز)کراچی کے رہائشی موبائل ڈیلر علی جمیل بلوچستان میں دشت کے علاقے میں نامعلوم افراد کی فائرنگ سے جاں بحق ہو گئے۔ افسوسناک واقعہ گزشتہ شب پیش آیا، جس میں ایک خاتون شدید زخمی جبکہ دو کمسن بچے محفوظ رہے۔
کراچی موبائل اینڈ الیکٹرانکس ڈیلرز ایسوسی ایشن کے چیئرمین منہاج گلفام کے مطابق ناظم آباد کا رہائشی خاندان گاڑی میں کراچی سے کوئٹہ جا رہا تھا کہ مبینہ طور پر گوگل میپ کی غلط رہنمائی کے باعث دشت کے علاقے کھنڈ میں پہنچ گیا۔
اطلاعات کے مطابق راستہ بھٹکنے پر نامعلوم مسلح افراد نے گاڑی پر اندھا دھند فائرنگ کر دی، جس کے نتیجے میں خاندان کے سربراہ علی جمیل موقع پر ہی جاں بحق ہو گئے جبکہ ان کے ساتھ موجود خاتون شدید زخمی ہوئیں۔ واقعے کے وقت گاڑی میں موجود دو کمسن بچے محفوظ رہے۔
واقعے کے بعد مقامی انتظامیہ نے تحقیقات شروع کر دی ہیں جبکہ زخمی خاتون کو طبی امداد فراہم کی جا رہی ہے۔ اہلِ خانہ اور تاجر برادری نے واقعے پر گہرے دکھ اور تشویش کا اظہار کیا ہے۔
