وزیراعظم شہباز شریف کا پاکستان رینجرز (سندھ) کو دہشت گرد حملہ ناکام بنانے پر خراجِ تحسین
کراچی(بولونیوز) وزیراعظم محمد شہباز شریف نے کراچی میں پاکستان رینجرز (سندھ) کے کیمپ پر فتنہ الہندوستان کے دہشت گردوں کے بزدلانہ حملے کو ناکام بنانے پر سکیورٹی فورسز کو زبردست خراجِ تحسین پیش کیا ہے۔
وزیراعظم نے اپنے بیان میں کہا کہ پاکستان رینجرز کے جوانوں نے دہشت گردوں کے مذموم عزائم کو ناکام بنا کر ایک بار پھر اپنی پیشہ ورانہ صلاحیت، بہادری اور فرض شناسی کا عملی ثبوت دیا ہے۔ ان کا کہنا تھا کہ سکیورٹی فورسز نے بروقت اور مؤثر کارروائی کرتے ہوئے تین دہشت گردوں کو ہلاک اور ایک کو زندہ گرفتار کر کے جارحانہ عزائم کو خاک میں ملا دیا۔
وزیراعظم شہباز شریف نے آپریشن کے دوران وطن پر اپنی جانیں نچھاور کرنے والے شہداء کو پوری قوم کی جانب سے سلام پیش کرتے ہوئے کہا کہ ان کی قربانیاں ہمیشہ یاد رکھی جائیں گی۔ انہوں نے شہداء کے اہلِ خانہ سے تعزیت کا اظہار کرتے ہوئے کہا کہ حکومت اور پوری قوم ان کے دکھ میں برابر کی شریک ہے۔
وزیراعظم نے زخمی اہلکاروں کی جلد صحتیابی کے لیے دعا کی اور کہا کہ شہداء کا خون رائیگاں نہیں جائے گا، دہشت گردی کے ہر فتنے کا پوری قوت سے خاتمہ کیا جائے گا۔ انہوں نے واضح کیا کہ فتنہ الہندوستان اور اس کے سرپرست اپنے ناپاک عزائم میں کبھی کامیاب نہیں ہوں گے۔
انہوں نے کہا کہ قوم اپنی بہادر مسلح افواج، رینجرز اور قانون نافذ کرنے والے اداروں کے شانہ بشانہ کھڑی ہے، اور دہشت گردی کے ناسور کے مکمل خاتمے تک یہ جدوجہد پوری قوت اور عزم کے ساتھ جاری رہے گی۔
