آڈیٹر جنرل کی رپورٹ میں وفاقی وزارتوں میں اربوں روپے کی مالی بے ضابطگیاں بے نقاب
اسلام آباد(بولونیوز) سابق چیئرمین سینیٹ میاں رضا ربانی نے کہا ہے کہ آڈیٹر جنرل آف پاکستان کی رپورٹ نے وفاقی وزارتوں میں اربوں روپے کی مالی بے ضابطگیوں کو بے نقاب کر دیا ہے۔
انہوں نے مطالبہ کیا کہ صوبوں سے غیر آئینی طور پر حاصل کیے جانے والے فنڈز کی نگرانی مشترکہ مفادات کونسل کے ذریعے کی جائے تاکہ آئینی تقاضوں کے مطابق شفافیت اور جوابدہی یقینی بنائی جا سکے۔
نجی ٹی وی سے گفتگو کرتے ہوئے میاں رضا ربانی نے کہا کہ آئینِ پاکستان 1973ء کو نظر انداز کرتے ہوئے کابینہ میں موجود مبینہ ’’نارووال گینگ‘‘ نے تین برس کے لیے قابلِ تقسیم پول میں صوبوں کے حصے کو منجمد کر دیا، جبکہ آئین کے آرٹیکل 164 کے تحت صوبوں سے گرانٹس بھی حاصل کی جا رہی ہیں۔
ان کا کہنا تھا کہ آڈیٹر جنرل کی رپورٹ میں وفاقی حکومت کے مالیاتی انتظام کی سنگین خامیاں واضح طور پر سامنے آئی ہیں، جن میں بڑے پیمانے پر مالی بے ضابطگیاں، کمزور نگرانی، رقوم کی عدم وصولی، غیر مجاز اخراجات اور حکمرانی کی ناکامیاں شامل ہیں۔ انہوں نے زور دیا کہ ان معاملات پر پارلیمانی اور آئینی فورمز کے ذریعے فوری کارروائی ناگزیر ہے۔
