قطر نے ایران کے 6 ارب ڈالر تہران منتقل ہونے کی خبروں کی تردید کر دی
دوحہ(بولونیوز)قطر نے ایران کے 6 ارب ڈالر تہران منتقل ہونے کی خبروں کو بے بنیاد قرار دیتے ہوئے واضح کیا ہے کہ یہ رقم تاحال قطر کے بینکوں میں موجود ہے اور اس پر امریکی پابندیوں کے تحت سخت نگرانی برقرار ہے۔
دوحہ سے قطری وزارت خارجہ کے ترجمان ماجد الانصاری نے بتایا کہ یہ رقم ایران کی جنوبی کوریا میں منجمد تیل کی آمدنی تھی، جو 2023 میں امریکا اور ایران کے درمیان قیدیوں کے تبادلے کے معاہدے کے تحت قطر منتقل کی گئی تھی۔
ترجمان کے مطابق امریکا اور ایران کے درمیان 5،5 قیدیوں کے تبادلے کے بعد یہ رقم جنوبی کوریا سے قطر منتقل کی گئی، تاہم امریکی شہریوں کی رہائی کے باوجود یہ رقم اب تک ایران کے حوالے نہیں کی گئی۔
ماجد الانصاری نے واضح کیا کہ ایرانی فنڈز قطر کے بینکوں میں موجود ہیں اور امریکی پابندیوں کے دائرہ کار میں ہیں، اس لیے ایران کو 6 ارب ڈالر تک براہِ راست رسائی حاصل نہیں۔ انہوں نے کہا کہ ایرانی صدر کے اعلان کے باوجود منجمد فنڈز کی تہران منتقلی تاحال عمل میں نہیں آئی۔
قطری وزارت خارجہ کے ترجمان نے مزید کہا کہ یہ فنڈز قطر کی ملکیت نہیں بلکہ ایران کے اثاثے ہیں، اور ان کے استعمال یا منتقلی پر بدستور امریکی نگرانی برقرار ہے۔
