بجلی کے بغیر سمندر کا کھارا پانی میٹھا، چینی ٹیکنالوجی نے دنیا کو حیران کر دیا
بیجنگ(بولونیوز)چینی محققین نے ایسی جدید ٹیکنالوجی متعارف کرا دی ہے جو بغیر بجلی کے سمندر کے کھارے پانی کو میٹھے پانی میں تبدیل کر سکتی ہے۔ ماہرین کے مطابق یہ نظام صرف سورج کی روشنی سے چلتا ہے اور صاف پانی کے عالمی بحران کے حل میں اہم کردار ادا کر سکتا ہے۔
تحقیقی رپورٹ کے مطابق یہ جدید نظام شمسی توانائی کو مؤثر انداز میں استعمال کرتے ہوئے پانی سے نمک اور دیگر مضر اجزا الگ کرتا ہے، جس کے لیے نہ بجلی درکار ہے اور نہ ہی مہنگا انفرااسٹرکچر۔ محققین کا کہنا ہے کہ یہ طریقہ خاص طور پر ان ساحلی اور پسماندہ علاقوں کے لیے مفید ثابت ہو سکتا ہے جہاں بجلی اور صاف پانی کی شدید کمی ہے۔
ماہرین کے مطابق مستقبل میں اس ٹیکنالوجی کی مدد سے صاف پانی کی پیداوار کی لاگت بوتل بند پانی سے بھی کم ہو سکتی ہے، جس سے دنیا بھر میں کروڑوں افراد کو سستا اور محفوظ پینے کا پانی میسر آ سکے گا۔
تحقیق سے وابستہ سائنسدانوں کا کہنا ہے کہ اگر اس نظام کو بڑے پیمانے پر اپنایا گیا تو یہ نہ صرف پانی کے بحران میں کمی لائے گا بلکہ ماحولیاتی آلودگی اور توانائی کے مسائل کے حل میں بھی مددگار ثابت ہوگا۔ چینی تحقیق کو عالمی سطح پر پانی کی قلت کے خلاف ایک بڑی پیش رفت قرار دیا جا رہا ہے۔
