برطانوی وزیراعظم کا افواج کے لیے 15 ارب پاؤنڈ کی اضافی فنڈنگ کا اعلان
لندن(بولونیوز)برطانوی وزیراعظم سر کیئر اسٹارمر نے برطانوی مسلح افواج کے لیے 15 ارب پاؤنڈ کی اضافی فنڈنگ کا اعلان کر دیا ہے۔ برطانوی میڈیا رپورٹس کے مطابق وزارتِ دفاع نے حکومت سے مجموعی طور پر 28 ارب پاؤنڈ کی رقم طلب کی تھی، تاہم ابتدائی مرحلے میں 15 ارب پاؤنڈ کی منظوری دی گئی ہے۔
دفاعی ضروریات پر بات کرتے ہوئے وزیراعظم نے کہا کہ برطانیہ اپنے دفاع کے لیے پوری طرح تیار ہے کیونکہ دیگر ریاستیں برطانیہ کو نشانہ بنا رہی ہیں۔ ان کا کہنا تھا کہ برطانوی آرمی کو 10 گنا زیادہ مضبوط بنایا جائے گا اور 2029 تک سالانہ دفاعی اخراجات بڑھ کر 80 ارب پاؤنڈ تک پہنچ جائیں گے۔
سر کیئر اسٹارمر نے بتایا کہ دفاعی اخراجات پورے کرنے کے لیے بعض سڑکوں اور توانائی کے منصوبے ختم کیے جائیں گے، جبکہ ڈرونز اور خودمختار ہتھیاروں میں اضافے کے لیے 5 ارب پاؤنڈ کی خصوصی رقم بھی شامل کی گئی ہے۔
انہوں نے مزید کہا کہ رائل نیوی کو ہائبرڈ نیوی میں تبدیل کیا جائے گا، جس میں سیف کنٹرول ویسلز، مصنوعی ذہانت کے استعمال اور 6 نئے جنگی جہازوں کے لیے فنڈنگ شامل ہوگی۔
برطانوی وزیراعظم کا کہنا تھا کہ تنازعات کی نوعیت تیزی سے تبدیل ہو رہی ہے اور نیٹو کی اہمیت پہلے سے کہیں زیادہ بڑھ گئی ہے۔ ان کے مطابق جنگ سے بچنے کا بہترین طریقہ یہی ہے کہ اس کی تیاری مسلسل جاری رکھی جائے۔
