حج مشکل نہیں تھا، سیلفیوں نے زیادہ تھکا دیا: وسیم اکرم
مکہ مکرمہ(بولونیوز)قومی کرکٹ ٹیم کے سابق کپتان اور سوئنگ کے سلطان وسیم اکرم نے حج کے دوران پیش آنے والے تجربات اور مشکلات پر کھل کر بات کی ہے۔
وسیم اکرم نے رواں برس قومی ٹیم کے سابق کپتان مصباح الحق اور ٹی وی پریزنٹر فخر عالم کے ہمراہ حج کی سعادت حاصل کی۔ اس موقع پر ان کی تصاویر اور ویڈیوز بھی سوشل میڈیا پر وائرل ہوئیں۔
وسیم اکرم نے اپنے سوشل میڈیا اکاؤنٹ انسٹاگرام پر ایک ویڈیو شیئر کی، جس میں فخر عالم نے حج اور عید کی مبارک باد دیتے ہوئے ان سے ذیابیطس کے مریض ہونے کے ناطے درپیش مشکلات کے بارے میں سوال کیا۔ جواب میں وسیم اکرم نے بتایا کہ وہ اپنی فریز (Freez) کی ہوئی انسولین ساتھ لے کر آئے تھے جو 24 گھنٹے تک کارآمد رہتی ہے۔
انہوں نے کہا کہ ان کے خیال میں حج مشکل نہیں تھا کیونکہ انسان عبادت کے لیے آتا ہے، اور ہر مسلمان کے لیے زندگی میں ایک بار حج ادا کرنا ضروری ہے۔ وسیم اکرم نے مسکراتے ہوئے مزید کہا کہ انہیں اصل میں سیلفیوں نے زیادہ تھکا دیا۔
وسیم اکرم کا کہنا تھا، ’’میں معذرت چاہتا ہوں، سب سے محبت ہے، منیٰ میں نماز سے فارغ ہوا تو سات افراد تصاویر لینے کے لیے کھڑے تھے۔‘‘ انہوں نے حج کو ایک بہترین روحانی تجربہ قرار دیتے ہوئے بتایا کہ انہوں نے وہاں سب کے لیے دعا کی۔
