براؤن یونیورسٹی میں امتحانات کے دوران فائرنگ، 2 افراد ہلاک، 8 شدید زخمی
رہوڈ آئی لینڈ(بولونیوز)امریکی ریاست رہوڈ آئی لینڈ کی براؤن یونیورسٹی میں امتحانات کے دوران ایک نامعلوم حملہ آور کی فائرنگ سے دو افراد ہلاک اور آٹھ شدید زخمی ہو گئے۔ زخمیوں میں سے کئی کی حالت نازک بتائی جا رہی ہے۔
حکام کے مطابق واقعہ یونیورسٹی کی انجینئرنگ اور فزکس کی سات منزلہ عمارت “بارس اینڈ ہولی” میں پیش آیا، جب طلبہ فائنل امتحانات دے رہے تھے۔ ایک طالب علم نے بتایا کہ وہ خوف کے عالم میں دو گھنٹے تک میز کے نیچے چھپا رہا، جب تک پولیس نے عمارت کو کلیئر نہیں کیا۔
پولیس کے مطابق حملہ آور سیاہ لباس میں ملبوس ایک مرد تھا جو فائرنگ کے بعد پیدل فرار ہو گیا۔ ابھی تک کوئی ہتھیار برآمد نہیں ہو سکا اور ملزم کی گرفتاری کے لیے بڑے پیمانے پر سرچ آپریشن جاری ہے۔
تمام زخمیوں کو مقامی اسپتال منتقل کیا گیا ہے، جہاں اسپتال انتظامیہ کے مطابق چھ زخمی نازک مگر مستحکم حالت میں ہیں۔ صدر ٹرمپ نے متاثرین کے لیے دعا اور جلد از جلد انصاف کے وعدے کا اظہار کیا ہے۔
