پی آئی اے کی بحالی کے لیے سابق ایتھوپین ایئرلائنز سربراہ ٹیوولڈے گیبریمریم مقرر
اسلام آباد(بولونیوز) پاکستان انٹرنیشنل ایئرلائنز (پی آئی اے) نے ادارے کی بحالی اور جدید خطوط پر استوار کرنے کے لیے ایتھوپین ایئرلائنز کے سابق چیف ایگزیکٹو آفیسر ٹیوولڈے گیبریمریم کو ادارے کی ٹرانسفارمیشن کی قیادت سونپ دی ہے۔
ٹیوولڈے گیبریمریم کو ہوا بازی کے شعبے میں وسیع تجربہ حاصل ہے۔ ان کی قیادت میں ایتھوپین ایئرلائنز نے نمایاں ترقی کرتے ہوئے افریقہ کی سب سے بڑی ایئرلائن کا اعزاز حاصل کیا تھا۔ توقع کی جا رہی ہے کہ وہ پی آئی اے کی آپریشنل کارکردگی، مسافر سہولیات اور عالمی سطح پر ادارے کی ساکھ کو بہتر بنانے میں اہم کردار ادا کریں گے۔
یہ تقرری پی آئی اے کی نجکاری اور انتظامی کنٹرول عارف حبیب گروپ کی سربراہی میں قائم کنسورشیم کو منتقل کیے جانے کے بعد عمل میں آئی ہے۔ نئی انتظامیہ کی جانب سے فضائی بیڑے میں توسیع، جدید طرز کی اصلاحات، نیٹ ورک کی وسعت اور آپریشنل بہتری کے لیے نئی سرمایہ کاری کا بھی منصوبہ بنایا گیا ہے، تاکہ قومی ایئرلائن کو دوبارہ ایک مضبوط اور منافع بخش ادارہ بنایا جا سکے۔
