سمندر پار پاکستانیوں کی محنت، وطن کے لیے بڑا تحفہ: ترسیلاتِ زر میں شاندار اضافہ
اسلام آباد(بولونیوز)اسٹیٹ بینک آف پاکستان کے تازہ ترین اعداد و شمار کے مطابق مالی سال 2025-26 کے پہلے سات ماہ میں ترسیلاتِ زر میں نمایاں اضافہ ریکارڈ کیا گیا ہے۔ جولائی تا جنوری 2026 کے دوران مجموعی حجم 23.2 ارب ڈالر تک پہنچ گیا، جو پچھلے سال اسی مدت میں 20.9 ارب ڈالر تھا۔
صرف جنوری 2026 میں پاکستانیوں کو 3.47 ارب ڈالر وطن بھیجے گئے، جو پچھلے سال جنوری کے مقابلے میں 15 فیصد کا شاندار اضافہ ہے۔ اسٹیٹ بینک کے مطابق رواں مالی سال کے اختتام تک ترسیلاتِ زر کا حجم 42 ارب ڈالر کی تاریخی سطح تک پہنچنے کا امکان ہے۔
سب سے زیادہ ترسیلات سعودی عرب (74 کروڑ ڈالر)، متحدہ عرب امارات (70 کروڑ ڈالر)، برطانیہ (57 کروڑ ڈالر) اور امریکہ (30 کروڑ ڈالر) سے موصول ہوئیں۔
اسٹیٹ بینک کی رپورٹ میں بتایا گیا ہے کہ جولائی سے جنوری تک مجموعی طور پر 11 فیصد اضافہ ہوا، جبکہ ماہانہ موازنہ میں جنوری میں دسمبر کے مقابلے میں معمولی 4 فیصد کمی دیکھنے میں آئی، تاہم گزشتہ سال کے جنوری کے مقابلے میں 15 فیصد اضافہ خوش آئند ہے۔
ماہرین کے مطابق سعودی عرب اور یو اے ای بدستور پاکستانی معیشت کے بڑے سہارا ثابت ہو رہے ہیں۔ محنت کشوں کی یہ کمائی پاکستان کے زرمبادلہ کے ذخائر کو سہارا دینے میں کلیدی کردار ادا کر رہی ہے۔
مزید برآں، اوپن مارکیٹ اور انٹر بینک ریٹ میں فرق ختم ہونے کے بعد شہری قانونی ذرائع جیسے بینک اور ایکسچینج کمپنیوں کا استعمال بڑھا رہے ہیں۔ حکومت اور اسٹیٹ بینک کی اسکیمیں، جن میں “سوہنی دھرتی ریمیٹنس پروگرام” اور روشن ڈیجیٹل اکاؤنٹ (RDA) شامل ہیں، بھی اس اضافے میں مددگار ثابت ہوئی ہیں۔
