افغان طالبان کی جانب سے بلوچستان میں چار ڈرون دراندازی کی کوشش ناکام
اسلام آباد(بولونیوز) 30 جون کو افغان طالبان کی جانب سے بلوچستان کے سرحدی علاقے میں چار (4) ابتدائی نوعیت کے ڈرون پاکستان میں داخل کرنے کی کوشش کی گئی، جو افغانستان کے زیرِ کنٹرول علاقوں سے دہشت گرد تنظیموں کی سرپرستی اور معاونت کا تسلسل ہے۔
سکیورٹی ذرائع کے مطابق پاکستان کے مضبوط فضائی دفاعی نظام نے ان دشمنانہ فضائی پلیٹ فارمز کو بروقت شناخت کر لیا۔ اعلیٰ آپریشنل تیاری کا مظاہرہ کرتے ہوئے سکیورٹی فورسز نے جدید کاؤنٹر میژرز کے ذریعے تمام چاروں ڈرونز کو کامیابی سے ناکارہ بنا دیا۔ فوری اور مؤثر ردعمل کے باعث دشمن کی یہ مذموم کوشش ناکام ہو گئی۔
ذرائع کا کہنا ہے کہ افغان طالبان کی جانب سے اس قسم کی کارروائیاں اپنی مظلوم افغان عوام کو گمراہ کرنے کی کوشش ہیں، جو پہلے ہی ایک جابرانہ نظام کے تحت مشکلات کا شکار ہیں۔ افغان طالبان کو سمجھنا چاہیے کہ غیر ذمہ دارانہ رویہ افغان عوام کی مشکلات میں مزید اضافہ کر رہا ہے۔ دہشت گردی کی سرپرستی ترک کر کے پرامن بقائے باہمی کے اصولوں کی پاسداری ہی خطے کے مفاد میں ہے۔
حکام نے خبردار کیا کہ اگر افغان طالبان پاکستان کو اشتعال دلانے کی روش پر قائم رہے تو انہیں بھرپور اور سخت جواب دیا جائے گا، جس کی قیمت انہیں بھاری پڑے گی۔
بیان میں کہا گیا کہ پاکستان کی مسلح افواج مکمل طور پر چوکس اور مادرِ وطن کے ایک ایک انچ کے دفاع کی صلاحیت رکھتی ہیں۔ پاکستان کی خودمختاری کو چیلنج کرنے یا عوام کی سلامتی کو خطرے میں ڈالنے والی کسی بھی مہم جوئی یا سرحد پار اشتعال انگیزی کا جواب آپریشن غضبُ الحق کے تحت تیز، فیصلہ کن اور بھرپور انداز میں دیا جاتا رہے گا۔
