ایرانی سپریم لیڈر کی جانب سے معاہدے کی منظوری کا دعویٰ، صدر ٹرمپ
واشنگٹن(بولونیوز)امریکی صدر ڈونلڈ ٹرمپ نے دعویٰ کیا ہے کہ امریکا اور ایران کے درمیان زیرِ تکمیل معاہدے کو ایران کے سپریم لیڈر کی منظوری حاصل ہوچکی ہے۔
وائٹ ہاؤس میں صحافیوں سے گفتگو کرتے ہوئے صدر ٹرمپ سے سوال کیا گیا کہ کیا ایرانی قیادت نے مجوزہ معاہدے کی منظوری دے دی ہے، جس پر انہوں نے کہا کہ ان کی معلومات کے مطابق اس کا جواب ہاں میں ہے۔ ان کے بقول ایران کے سپریم لیڈر مجتبیٰ خامنہ ای معاہدے کی تمام شقوں سے آگاہ ہیں اور ان کی منظوری کے بغیر وہاں کوئی فیصلہ نہیں ہوتا، اس لیے قوی امکان ہے کہ معاہدے کی منظوری دی جاچکی ہے۔
صدر ٹرمپ نے کہا کہ معاہدے پر دستخط ہوتے ہی امریکا ایران کی بندرگاہوں پر عائد بحری ناکہ بندی ختم کردے گا، جس کے نتیجے میں عالمی منڈی میں تیل کی قیمتوں میں نمایاں کمی متوقع ہے۔
انہوں نے مزید بتایا کہ معاہدے پر دستخط کی تقریب یورپ میں منعقد کی جائے گی، جس میں امریکا کی نمائندگی نائب صدر جے ڈی وینس کریں گے، جبکہ وہ خود اس تقریب میں شرکت نہیں کرپائیں گے۔
دوسری جانب صدر ٹرمپ کے دعوؤں کے برعکس ایران کی جانب سے تاحال اس معاہدے کی نہ تو باضابطہ تصدیق کی گئی ہے اور نہ ہی تردید سامنے آئی ہے۔ مبصرین کے مطابق ماضی میں بھی صدر ٹرمپ کی جانب سے ایران کے ساتھ معاہدہ قریب ہونے کے بیانات دیے جاتے رہے ہیں، تاہم حتمی پیش رفت سامنے نہیں آسکی تھی۔
