مقبوضہ کشمیر میں بھارتی فورسز کے ہاتھوں 16 کشمیری شہید
سری نگر(بولونیوز)مقبوضہ جموں و کشمیر کے دارالحکومت سری نگر میں کشمیر میڈیا سروس کی جانب سے جاری اعداد و شمار کے مطابق بھارتی فورسز کے ہاتھوں دو ہزار چھبیس کے پہلے پانچ ماہ کے دوران 16 کشمیری شہید ہوئے ہیں۔
رپورٹ میں بتایا گیا ہے کہ ان کارروائیوں میں بھارتی فوج، راشٹریہ رائفلز اور سینٹرل ریزرو پولیس فورس نے حصہ لیا، جبکہ اسپیشل آپریشنز گروپ اور دیگر خفیہ اداروں پر بھی ریاستی کارروائیوں میں ملوث ہونے کے الزامات عائد کیے گئے ہیں۔
کشمیر میڈیا سروس کے مطابق یہ واقعات مختلف علاقوں میں سرچ آپریشنز اور محاصروں کے دوران پیش آئے، جبکہ متعدد نوجوانوں کو گرفتار بھی کیا گیا اور گھروں پر چھاپوں کا سلسلہ بھی جاری رہا۔
انسانی حقوق کی تنظیموں نے ان کارروائیوں پر تشویش کا اظہار کرتے ہوئے کہا ہے کہ بڑھتی ہوئی فوجی سرگرمیوں سے خطے میں خوف اور بے چینی میں اضافہ ہو رہا ہے۔
کشمیری رہنماؤں اور متاثرہ خاندانوں نے عالمی برادری سے مطالبہ کیا ہے کہ وہ فوری مداخلت کرے اور مقبوضہ علاقے میں انسانی حقوق کی صورتحال بہتر بنانے کے لیے کردار ادا کرے۔
