پاکستان کی لبنان پر اسرائیلی حملوں کی مذمت، عالمی قوانین کی خلاف ورزی قرار
نیویارک(بولونیوز)پاکستان نے لبنان پر اسرائیلی حملوں کی شدید مذمت کرتے ہوئے انہیں بین الاقوامی قوانین کی خلاف ورزی قرار دیا ہے۔اقوام متحدہ کی سلامتی کونسل میں پاکستان کے مستقل مندوب عاصم افتخار احمد نے خطاب کرتے ہوئے لبنان پر اسرائیلی حملوں پر گہری تشویش کا اظہار کیا اور کہا کہ پائیدار امن صرف بات چیت اور سفارتی عمل کے ذریعے ہی ممکن ہے۔
انہوں نے کہا کہ پاکستان لبنان کی حکومت اور عوام کے ساتھ مکمل یکجہتی کا اظہار کرتا ہے اور خطے میں کشیدگی کم کرنے کے لیے سفارتی کوششیں جاری رکھے گا۔
پاکستانی مندوب کے مطابق لبنان میں شہری آبادی کو نشانہ بنایا جا رہا ہے، جو کہ نہ صرف انسانی حقوق کی خلاف ورزی ہے بلکہ خطے میں امن و استحکام کی کوششوں کو بھی شدید نقصان پہنچا رہا ہے۔
