کراچی(بولونیوز)ایڈیشنل آئی جی سندھ مظفر علی شیخ نے کہا ہے کہ کراچی میں سندھ پولیس کے افسران اور اہلکاروں کے لیے 24 گھنٹے فعال ویلفیئر فسیلیٹیشن ڈیسک قائم کر دیا گیا ہے، جہاں پولیس اہلکار اور ان کے اہلِ خانہ ویلفیئر سے متعلق امور میں براہِ راست رہنمائی حاصل کر سکیں گے۔
ایڈیشنل آئی جی کے مطابق ویلفیئر فسیلیٹیشن ڈیسک کی ہاٹ لائنز 1049 اور 1058 جاری کر دی گئی ہیں، جبکہ سندھ پولیس ویلفیئر ڈیسک کا واٹس ایپ نمبر 0335-7224422 بھی فعال ہے۔ اس کے علاوہ لینڈ لائن نمبر 021-99212658 پر بھی رابطہ ممکن ہوگا۔
انہوں نے بتایا کہ اس سہولت سے شہداء، مرحوم، حاضر سروس اور ریٹائرڈ پولیس اہلکار مستفید ہو سکیں گے۔ ویلفیئر ڈیسک پر پنشن، کلیمز اور ویلفیئر درخواستوں کی موجودہ صورتحال سے فوری آگاہی فراہم کی جائے گی، جبکہ سندھ پولیس ہیلتھ کارڈ سے متعلق مکمل رہنمائی بھی دی جائے گی۔
ایڈیشنل آئی جی سندھ کا کہنا تھا کہ کسی بھی ایمرجنسی صورتحال میں بڑے نجی اور سرکاری اسپتالوں سے فوری کوآرڈینیشن کی جائے گی تاکہ پولیس اہلکاروں اور ان کے اہلِ خانہ کو بروقت طبی سہولیات فراہم کی جا سکیں۔
انہوں نے مزید بتایا کہ آئی جی سندھ جاوید عالم اوڈھو، ایڈیشنل آئی جی سندھ مظفر علی شیخ اور اے آئی جی پولیس ویلفیئر کیپٹن حیدر رضا کی ہدایت پر تمام زونز، اضلاع اور تھانوں میں ویلفیئر ہیلپ لائن کی تشہیر کے احکامات جاری کر دیے گئے ہیں۔
واضح رہے کہ ایڈیشنل آئی جی سندھ مظفر علی شیخ ایک بہترین اور ملنسار پولیس افسر کے طور پر جانے جاتے ہیں، جو سندھ پولیس میں ویلفیئر کے معاملات میں شفافیت اور بروقت سہولیات کی فراہمی کو یقینی بنانے کے لیے عملی اقدامات کر رہے ہیں، تاکہ پولیس کے جوانوں اور اہلکاروں کو بہتر سے بہتر سہولیات فراہم کی جا سکیں۔