ڈی آئی جی آپریشنز فیصل کامران کی زیرِ صدارت صدر ڈویژن کا اینٹی کرائم اجلاس
لاہور(بولونیوز) ڈی آئی جی آپریشنز فیصل کامران کی زیرِ صدارت صدر ڈویژن کا اہم اینٹی کرائم اجلاس منعقد ہوا، جس میں ایس پی صدر، سرکل افسران اور تمام ایس ایچ اوز نے شرکت کی۔ اجلاس میں رواں ماہ انسدادِ جرائم کی کارروائیوں اور مجموعی کارکردگی کا تفصیلی جائزہ لیا گیا۔
ڈی آئی جی آپریشنز نے تمام ایس ایچ اوز کو ہدایت کی کہ سٹریٹ کرائم اور جھپٹا مار وارداتوں میں نمایاں کمی یقینی بنائی جائے۔ انہوں نے ایس ایچ او چونگ اور ٹاؤن شپ کو اشتہاری ملزمان کی گرفتاری کا ٹاسک جلد از جلد مکمل کرنے کا حکم دیا۔
فیصل کامران نے واضح کیا کہ جرائم کی روک تھام میں غفلت یا اعداد و شمار میں مصنوعی کمی کسی صورت قابلِ قبول نہیں۔ انہوں نے ہدایت کی کہ تمام ایس ایچ اوز اپنے علاقوں میں مجالس اور جلوسوں کی سکیورٹی خود مانیٹر کریں اور ہاٹ اسپاٹ علاقوں میں مؤثر پولیس نفری اور گشت کو یقینی بنایا جائے۔
انہوں نے مزید کہا کہ تھانوں اور دفاتر میں آنے والے ہر شہری سے خوش اخلاقی اور عزت کے ساتھ پیش آیا جائے، جبکہ خواتین اور بچوں سے متعلق مقدمات کو ترجیحی بنیادوں پر فوری نمٹایا جائے۔ ناجائز اسلحہ رکھنے والوں، منشیات فروشوں اور جرائم پیشہ عناصر کے خلاف کریک ڈاؤن مزید تیز کرنے، موٹرسائیکل چوری و سنیچنگ کی روک تھام کے لیے مؤثر حکمتِ عملی اپنانے اور نجی ملازمین، کرایہ داروں اور سکیورٹی گارڈز کی رجسٹریشن ہر صورت یقینی بنانے کی بھی ہدایت کی گئی۔
