لاہور ہائیکورٹ کا پولیس کریکٹر سرٹیفکیٹ کے موجودہ فارمیٹ میں تبدیلی کا حکم
لاہور(بولونیوز)لاہور ہائیکورٹ نے پولیس کریکٹر سرٹیفکیٹ کے موجودہ فارمیٹ کو تبدیل کرنے کا حکم دے دیا ہے۔ عدالت نے واضح ہدایات جاری کرتے ہوئے کہا ہے کہ کریکٹر سرٹیفکیٹ کے لیے دو الگ الگ فارمیٹس ہونے چاہئیں۔
عدالت کے مطابق ایک فارمیٹ سزا یافتہ افراد کے لیے مخصوص ہو، جبکہ دوسرا فارمیٹ اُن افراد کے لیے ہو جو غیر سزا یافتہ ہوں یا جنہیں عدالت سے بری کیا جا چکا ہو۔ لاہور ہائیکورٹ نے قرار دیا کہ موجودہ یکساں فارمیٹ شہریوں کے بنیادی حقوق اور قانونی حیثیت کو متاثر کرتا ہے۔
عدالتی حکم میں کہا گیا ہے کہ کسی فرد کو محض مقدمات میں نامزد ہونے یا بعد ازاں بری ہو جانے کے باوجود منفی انداز میں ظاہر کرنا ناانصافی کے مترادف ہے۔ اس لیے پولیس کریکٹر سرٹیفکیٹ میں سزا یافتہ اور غیر سزا یافتہ افراد کے درمیان واضح فرق ہونا ضروری ہے۔
لاہور ہائیکورٹ نے متعلقہ حکام کو ہدایت کی ہے کہ عدالتی فیصلے کی روشنی میں فوری طور پر پولیس کریکٹر سرٹیفکیٹ کے نئے فارمیٹس تیار کیے جائیں اور ان پر عمل درآمد کو یقینی بنایا جائے۔
