پیمرا کا جیو نیوز کی نشریات 15 روز کے لیے معطل کرنے کا حکم
اسلام آباد(بولونیوز)پاکستان الیکٹرانک میڈیا ریگولیٹری اتھارٹی PEMRA نے 10 محرم کی نشریات میں ’’ناقابلِ قبول مذہبی تصویر کشی‘‘ کے معاملے پر ہفتے کے روز Geo News کو نوٹس جاری کرتے ہوئے 15 روز کے لیے چینل کی نشریات معطل کرنے کے احکامات جاری کر دیے ہیں۔
پیمرا کی جانب سے 27 جون کو جاری نوٹس میں کہا گیا ہے کہ جیو نیوز نے 26 جون 2026 کو نشر ہونے والے پروگرام ’’سفرِ عشق‘‘ میں ناقابلِ قبول مذہبی تصویر کشی کی، جو نہ صرف چینل کے لائسنس کی خلاف ورزی ہے بلکہ مذہبی، معاشرتی اور ثقافتی اقدار و اصولوں کے بھی منافی ہے۔
نوٹس میں کہا گیا کہ ایسی تصویر کشی پیمرا قوانین اور ضوابط کی متعدد شقوں کی صریح خلاف ورزی کے زمرے میں آتی ہے، جس سے مذہبی جذبات مجروح ہوئے اور مزید مجروح ہونے کا خدشہ بھی موجود ہے۔ اسی بنیاد پر جیو نیوز کا لائسنس 15 روز کے لیے معطل کیا جا رہا ہے۔
پیمرا کے مطابق جیو نیوز کی نشریات سیٹلائٹ سمیت تمام نشریاتی نیٹ ورکس پر معطل رہیں گی، جبکہ تمام ڈسٹری بیوٹرز اور کیبل آپریٹرز کو ہدایت کی گئی ہے کہ ان احکامات پر فوری اور مکمل عملدرآمد کو یقینی بنائیں۔
اتھارٹی نے مزید بتایا کہ اس معاملے پر پیمرا کی شکایات کونسل بھی سماعت کرے گی اور آئندہ کے لیے مزید ریگولیٹری کارروائی سے متعلق سفارشات مرتب کی جائیں گی۔ دوسری جانب جیو نیوز کی جانب سے اس معاملے پر وضاحت پیش کی گئی ہے اور معذرت بھی کی گئی ہے۔
