بانی پی ٹی آئی اور بشریٰ بی بی کی قیدی تنہائی کے خلاف درخواستوں پر سماعت
اسلام آباد(بولونیوز)بانی پاکستان تحریکِ انصاف عمران خان اور ان کی اہلیہ بشریٰ بی بی کی قیدی تنہائی کے خلاف دائر درخواستوں پر سماعت جسٹس خادم حسین سومرو نے کی۔
سماعت کے دوران درخواست گزاروں کے وکلا بیرسٹر سلمان صفدر اور سلمان اکرم راجہ عدالت کے روبرو پیش ہوئے۔ وکلا نے عدالت کو آگاہ کیا کہ دونوں درخواستوں پر رجسٹرار آفس کی جانب سے اعتراضات عائد کیے گئے ہیں۔
بیرسٹر سلمان صفدر نے مؤقف اختیار کیا کہ علیمہ خانم بانی پی ٹی آئی کی جانب سے جبکہ مبشرہ خاور مانیکا بشریٰ بی بی کی جانب سے درخواست گزار ہیں۔ انہوں نے کہا کہ رجسٹرار آفس نے متاثرہ فریق ہونے کا اعتراض عائد کر رکھا ہے، حالانکہ مرکزی اپیل اور یہ درخواستیں الگ الگ نوعیت کے مقدمات ہیں۔
سلمان صفدر نے عدالت کو بتایا کہ ’’مائی لارڈ! ہم چار سال سے سیکھنے کی کوشش کر رہے ہیں، ہماری خواہش ہے کہ رجسٹرار آفس کے اعتراضات کے بغیر ہم براہِ راست آپ کے سامنے پیش ہو سکیں۔‘‘ انہوں نے مزید کہا کہ اپیلوں میں جب یہ معاملہ اٹھایا گیا تو چیف جسٹس کی جانب سے متعلقہ فورم سے رجوع کرنے کی ہدایت دی گئی تھی۔
وکلا نے یہ بھی بتایا کہ بشریٰ بی بی اس سے قبل بھی قیدی تنہائی کے خلاف درخواست دائر کر چکی ہیں۔ دلائل کے دوران انہوں نے سابق وزیر اعظم ذوالفقار علی بھٹو کے مقدمے کا حوالہ دیتے ہوئے کہا کہ اس وقت بیگم نصرت بھٹو نے بھی سپریم کورٹ میں درخواست دائر کی تھی۔
عدالت نے فریقین کے دلائل سننے کے بعد کیس کی مزید سماعت کے لیے کارروائی جاری رکھی، جبکہ رجسٹرار آفس کے اعتراضات پر بھی غور کیا جا رہا ہے۔
