سیکیورٹی فورسز کا کامیاب آپریشن، ہائی ویلیو ٹارگٹ کمانڈر خان فیروش عرف زابل ہلاک
ضلع باجوڑ(بولونیوز)سیکیورٹی فورسز کی جانب سے کامیاب آپریشن کی ویڈیو منظرِ عام پر آ گئی ہے، جس میں ہائی ویلیو ٹارگٹ کمانڈر خان فیروش عرف زابل کو تین دیگر خارجی دہشت گردوں سمیت ہلاک کرتے ہوئے دکھایا گیا ہے۔
سیکیورٹی ذرائع کے مطابق یہ کارروائی شاتھی منا زردالو کرومیٹ سائٹ میں کی گئی، جہاں دہشت گردوں کی موجودگی کی خفیہ اطلاع پر فورسز نے مؤثر اور بروقت آپریشن کیا۔ شدید فائرنگ کے تبادلے کے بعد چاروں دہشت گردوں کو جہنم واصل کر دیا گیا۔
ذرائع کا کہنا ہے کہ ہلاک ہونے والا کمانڈر خان فیروش عرف زابل متعدد سنگین دہشت گرد کارروائیوں میں ملوث تھا اور سیکیورٹی فورسز کو طویل عرصے سے مطلوب تھا۔ آپریشن کے دوران کسی سیکیورٹی اہلکار کے زخمی ہونے کی اطلاع نہیں ملی۔
سیکیورٹی فورسز نے علاقے کو کلیئر کر کے سرچ آپریشن مکمل کر لیا ہے جبکہ دہشت گردوں کے قبضے سے اسلحہ اور دیگر مشکوک مواد بھی برآمد کیا گیا ہے۔ حکام کے مطابق دہشت گردی کے خاتمے کے لیے ایسی کارروائیاں مستقبل میں بھی جاری رہیں گی۔
