نوشکی میں مسلح افراد کا شاہراہ پر حملہ، متعدد گاڑیوں کو آگ لگا دی گئی
نوشکی(بولونیوز)بلوچستان کے ضلع نوشکی میں مبینہ طور پر تقریباً 40 مسلح افراد نے شاہراہ پر حملہ کر کے متعدد گاڑیوں کو روک لیا اور درجنوں گاڑیوں کو آگ لگا دی۔
ابتدائی اطلاعات کے مطابق حملہ آوروں نے شاہراہ پر مسافروں اور ڈرائیوروں میں خوف و ہراس پھیلا دیا، جبکہ واقعے کے بعد ٹریفک کی روانی بھی متاثر ہوئی۔
واقعے کی اطلاع ملتے ہی سیکیورٹی فورسز کی بھاری نفری علاقے میں پہنچ گئی اور سرچ آپریشن شروع کر دیا گیا۔ حکام کے مطابق علاقے میں سیکیورٹی سخت کر دی گئی ہے اور حملہ آوروں کی تلاش جاری ہے۔
حکام کا کہنا ہے کہ واقعے کی تحقیقات جاری ہیں، جبکہ حملے میں ہونے والے ممکنہ جانی نقصان اور ذمہ دار عناصر کے حوالے سے سرکاری طور پر مزید تفصیلات کا انتظار کیا جا رہا ہے۔
