سندھ اسمبلی میں جیو نیوز کے قابلِ مذمت مواد کے خلاف قرارداد جمع
کراچی(بولونیوز)رکن سندھ اسمبلی اور پاکستان تحریک انصاف کے رکن سجاد علی سومرو نے صوبائی اسمبلی سندھ کے قواعدِ کار 2013 کے قاعدہ 124 کے تحت ایک اہم قرارداد جمع کرا دی ہے۔ قرارداد میں 10 محرم الحرام کے موقع پر جیو نیوز پر نشر کیے گئے قابلِ مذمت مواد کی شدید ترین الفاظ میں مذمت کی گئی ہے، جس سے کروڑوں مسلمانوں کے مذہبی جذبات مجروح ہوئے۔
قرارداد میں کہا گیا ہے کہ نبی کریم حضرت محمد مصطفیٰ ﷺ کی شانِ اقدس، ناموسِ رسالت ﷺ، عقیدۂ ختمِ نبوت اور اسلامی مقدسات کے حوالے سے کسی بھی قسم کی گستاخی یا بے حرمتی ناقابلِ قبول ہے۔ ایسے اقدامات نہ صرف اسلامی تعلیمات بلکہ پاکستان کے آئین اور ملکی قوانین کے بھی سراسر منافی ہیں۔
قرارداد میں اس امر پر زور دیا گیا ہے کہ اگرچہ حکومتِ پاکستان اور پیمرا کی جانب سے جیو نیوز کا لائسنس 15 روز کے لیے معطل کیا گیا ہے، تاہم اس سنگین نوعیت کے معاملے میں محض عارضی معطلی ناکافی ہے۔ قرارداد کے مطابق ذمہ دار افراد اور متعلقہ ادارے کے خلاف قانون کے مطابق سخت ترین کارروائی عمل میں لائی جائے اور آئندہ ایسی کسی بھی خلاف ورزی کی صورت میں متعلقہ میڈیا ادارے کا لائسنس مستقل طور پر منسوخ کرنے سمیت کڑے قانونی اقدامات کیے جائیں۔
سجاد علی سومرو کی جانب سے پیش کی گئی قرارداد میں واضح کیا گیا ہے کہ پاکستان تحریک انصاف ناموسِ رسالت ﷺ، عقیدۂ ختمِ نبوت اور تمام اسلامی مقدسات کے تحفظ پر کوئی سمجھوتہ نہیں کرے گی۔ یہ پارٹی کا ایمان، آئینی ذمہ داری اور قومی فریضہ ہے۔
