وزیراعلیٰ سندھ سید مراد علی شاہ کی این ای ڈی یونیورسٹی میں میڈیا سے گفتگو
کراچی(بولونیوز) سید مراد علی شاہ نے این ای ڈی یونیورسٹی آف انجینئرنگ اینڈ ٹیکنالوجی کراچی میں میڈیا سے بات چیت کرتے ہوئے کہا ہے کہ 18ویں ترمیم کے تحت صوبوں کو آئینی اختیارات حاصل ہو چکے ہیں اور ان اختیارات پر کوئی سمجھوتہ نہیں کیا جائے گا۔
وزیراعلیٰ سندھ کا کہنا تھا کہ بہبودِ آبادی کی کوآرڈینیشن کے لیے اگر کوئی وفاقی ادارہ قائم کیا جاتا ہے تو اس پر صوبے کو کوئی اعتراض نہیں، تاہم آئین کے مطابق اس کی ایگزیکٹو پاور صوبوں کے پاس ہی رہیں گی۔
سید مراد علی شاہ نے کہا کہ صوبے میں انٹیلی جنس نظام کو بہتر بنانے کے لیے کئی نئے ادارے قائم کیے گئے ہیں، اور وفاق کے ساتھ ساتھ صوبے بھی اپنی سطح پر انٹیلی جنس ادارے بنا رہے ہیں۔ ان کا کہنا تھا کہ انٹیلی جنس معلومات کے بغیر خودکش حملوں کو روکنا انتہائی مشکل ہوتا ہے۔
ایک سوال کے جواب میں وزیراعلیٰ سندھ نے کہا کہ فی الحال کوئی خاص تھریٹ نہیں، مگر اس کے باوجود حکومت اپنی طرف سے بھرپور تیاری کر رہی ہے۔
بجلی کی صورتحال پر بات کرتے ہوئے وزیراعلیٰ نے کہا کہ صوبے بھر میں بالخصوص کراچی میں 12 سے 18 گھنٹے کی لوڈشیڈنگ ہو رہی ہے، جس کی وہ سخت مذمت کرتے ہیں۔ انہوں نے کہا کہ وفاق صوبے کو ونڈ اور سولر پاور پر بجلی گھر لگانے کی اجازت نہیں دے رہا، جو ایک ناقابلِ فہم طرزِ عمل ہے۔
