حجاج کی سہولت کے لیے دنیا کے طویل ترین پیدل راستے کی تعمیر مکمل
مکہ مکرمہ(بولونیوز)سعودی عرب کے مقدس شہر مکہ مکرمہ میں حجاج کرام کی سہولت کے لیے دنیا کے طویل ترین پیدل راستے کی تعمیر مکمل کر لی گئی ہے، جسے ایک اہم اور تاریخی منصوبہ قرار دیا جا رہا ہے۔
یہ خصوصی واک وے میدانِ عرفات سے شروع ہو کر مزدلفہ سے گزرتا ہوا منیٰ تک پہنچتا ہے، اور اس کی مجموعی لمبائی 25 کلومیٹر سے زائد بتائی جا رہی ہے۔
منصوبے کا مقصد حج کے دوران لاکھوں زائرین کی آمد و رفت کو آسان، محفوظ اور منظم بنانا ہے۔ پیدل راستے میں آرام دہ سہولیات، رہنمائی کے لیے خصوصی سائن بورڈز اور دیگر ضروری انتظامات بھی شامل کیے گئے ہیں۔یہ جدید انفرااسٹرکچر منصوبہ حجاج کی سہولت اور حج کے دوران انتظامات کو مزید بہتر بنانے کی جانب ایک اہم پیش رفت قرار دیا جا رہا ہے۔
سوشل میڈیا پر اس منصوبے کی تصاویر اور ویڈیوز وائرل ہو رہی ہیں، جہاں صارفین اسے سعودی عرب کی جدید ترقی اور حجاج کرام کے لیے شاندار سہولت قرار دے رہے ہیں۔
