پٹرول کم استعمال کرنے اور ایک سال تک سونا نہ خریدنے کی ہدایت،نریندرمودی
حیدرآباد(بولونیوز) بھارتی وزیراعظم نریندر مودی نے عوام سے پٹرول کا کم سے کم استعمال اور ایک سال تک سونا نہ خریدنے کی اپیل کر دی ہے۔عالمی میڈیا کی رپورٹ کے مطابق وزیراعظم نریندر مودی نے حیدرآباد دکن میں ایک عوامی جلسے سے خطاب کرتے ہوئے ایران جنگ اور توانائی بحران کے باعث آنے والے معاشی بحران سے نمٹنے کے لیے اپنے عوام سے کفایت شعاری کی اپیل کر دی ہے۔
مودی نے عوام سے اپیل کی کہ وہ ایندھن کے استعمال میں کمی لائیں اور ایک سال تک سونا خریدنے سے گریز کریں تاکہ عالمی جنگوں اور سپلائی چین کے بحران کے باعث معیشت پر پڑنے والے دباؤ کو کم کیا جا سکے۔
ان کا کہنا تھا کہ کہ کورونا وبا اور دنیا بھر میں جاری جنگوں کے باعث عالمی سپلائی چین بری طرح متاثر ہوئی ہے، جس کے نتیجے میں تیل، کھاد اور دیگر ضروری اشیا کی قیمتوں میں اضافہ ہوا۔بھارتی وزیراعظم نے کہا کہ حکومت مختلف ممالک سے بات چیت کر کے پٹرول اور ڈیزل کے مسائل پر قابو پانے کی کوشش کر رہی ہے، لیکن طویل مدتی حل یہی ہے کہ ملک میں تیل کی کھپت کم کی جائے۔مودی نے کہا کہ عوام اگر ایک سال تک سونا خریدنا بند کر دیں، تو سونے کی درآمد کم ہوگی اور ملک کے زرمبادلہ کے ذخائر میں اضافہ ہوگا۔
