ایران جنگ: تیل کی قیمتوں میں 5 فیصد اضافہ، عالمی حصص بازار مندی کا شکار
اسلام آباد(بولونیوز)عالمی مالیاتی منڈیاں منگل کے روز غیر یقینی صورتحال کا شکار رہیں جب ایران تنازع میں بڑھتی ہوئی کشیدگی اور جنگ بندی مذاکرات پر ابہام کے باعث تیل کی قیمتوں میں تقریباً 5 فیصد تک اضافہ ریکارڈ کیا گیا، جس سے عالمی حصص بازاروں پر منفی اثر پڑا۔
عالمی منڈی میں برینٹ کروڈ کی قیمت 4.30 ڈالر اضافے کے ساتھ 99.78 ڈالر فی بیرل تک پہنچ گئی، جو تقریباً 100 ڈالر کی حد کو چھو رہی ہے۔ اسی طرح ویسٹ ٹیکساس انٹرمیڈیٹ (WTI) کی قیمت 4.75 ڈالر اضافے کے بعد 94.36 ڈالر فی بیرل ہو گئی، جو حالیہ ہفتوں میں ایک دن کے دوران ہونے والے بڑے اضافوں میں شمار کی جا رہی ہے۔
ماہرین کے مطابق تیل کی قیمتوں میں یہ تیزی ایران جنگ سے جڑی نئی فوجی کشیدگی، سفارتی کوششوں میں تعطل اور تیل کی سپلائی متاثر ہونے کے خدشات کے باعث سامنے آئی ہے۔عالمی حصص بازاروں میں بھی اس صورتحال کے باعث مندی دیکھی گئی، جبکہ سرمایہ کار محتاط حکمت عملی اپناتے ہوئے محفوظ سرمایہ کاری کی جانب مائل نظر آئے۔
معاشی تجزیہ کاروں کا کہنا ہے کہ اگر خطے میں کشیدگی برقرار رہی تو توانائی کی قیمتوں میں مزید اتار چڑھاؤ اور عالمی معیشت پر دباؤ بڑھنے کا خدشہ ہے۔
