سڈنی میں یہودیوں کی تقریب پر فائرنگ، 16 افراد ہلاک، 40 سے زائد زخمی
آسٹریلیا(بولونیوز)شہر سڈنی کے معروف ساحلی علاقے بونڈی بیچ پر اتوار کی شب یہودی تہوار ہنوکہ کی تقریب کے دوران فائرنگ کے ایک ہولناک واقعے میں کم از کم 16 افراد ہلاک اور 40 سے زائد زخمی ہو گئے۔
پولیس اور ریاستی محکمہ صحت کے مطابق ہلاک ہونے والوں میں 10 سالہ بچہ بھی شامل ہے، جب کہ سب سے زیادہ عمر کے مقتول کی عمر 87 سال بتائی جا رہی ہے۔ پیر کی صبح تک کم از کم 40 زخمی افراد مختلف اسپتالوں میں زیرِ علاج تھے، جن میں سے متعدد کی حالت تشویشناک بتائی گئی ہے۔
واقعے کے بعد علاقے کو گھیرے میں لے لیا گیا جبکہ پولیس اور سیکیورٹی اداروں نے تحقیقات کا آغاز کر دیا ہے۔ ابتدائی اطلاعات کے مطابق حملہ اس وقت کیا گیا جب تقریب میں بڑی تعداد میں لوگ موجود تھے۔
حکام کا کہنا ہے کہ واقعے کی وجوہات جاننے اور ملزمان کی گرفتاری کے لیے کارروائیاں جاری ہیں، جب کہ سڈنی بھر میں سیکیورٹی مزید سخت کر دی گئی ہے۔
