جو جج انصاف فراہم نہیں کر سکتے، انہیں عہدہ چھوڑ دینا چاہیے: علیمہ خان

راولپنڈی(بولونیوز) پاکستان تحریک انصاف کے بانی چیئرمین عمران خان کی ہمشیرہ علیمہ خان نے کہا ہے کہ “جو جج انصاف فراہم نہیں کر سکتے، انہیں اپنے عہدے چھوڑ دینے چاہئیں”۔

عدالت کے باہر میڈیا سے گفتگو کرتے ہوئے علیمہ خان نے عمران خان کی مبینہ آئیسولیشن پر شدید تشویش کا اظہار کیا۔ ان کا کہنا تھا کہ قانون کے مطابق قیدی کو ہفتہ وار فیملی، وکلاء اور رشتہ داروں سے ملاقات کی اجازت ہوتی ہے، مگر عمران خان کے معاملے میں اس قانون پر مکمل عمل نہیں ہو رہا۔

انہوں نے الزام عائد کیا کہ اسلام آباد ہائی کورٹ عمران خان کی اپیلیں سماعت کے لیے مقرر نہیں کر رہی۔ ان کے بقول، “اگر اپیل سماعت کے لیے مقرر ہوئی تو عدالت کو انہیں ضمانت دینا پڑے گی، اس لیے تاخیر کی جا رہی ہے۔”

علیمہ خان نے کہا کہ عمران خان کے خلاف مقدمے میں صرف سزا سنانے کی جلدی دکھائی جا رہی ہے۔ انہوں نے دعویٰ کیا کہ انہیں بتایا گیا ہے کہ آئندہ 10 سے 12 دن میں فیصلہ سنانے کا ارادہ ہے، مگر وہ ایسے اقدامات کے باوجود “اپنے احتجاج اور مؤقف سے پیچھے نہیں ہٹیں گی”۔