پاکستانی برآمدات کو دھچکا؛ 5 ماہ میں تجارتی خسارہ 37 فیصد بڑھ گیا
اسلام آباد(بولونیوز) ادارہ شماریات کی رپورٹ کے مطابق موجودہ مالی سال کے پہلے پانچ ماہ میں پاکستانی برآمدات میں نمایاں کمی جبکہ درآمدات میں اضافہ ریکارڈ کیا گیا، جس کے نتیجے میں تجارتی خسارے میں خطرناک حد تک اضافہ ہوا ہے۔
رپورٹ کے مطابق جولائی تا نومبر تجارتی خسارہ 37 فیصد یعنی 4 ارب 19 کروڑ ڈالر بڑھ گیا، جس کے بعد مجموعی تجارتی خسارہ 15 ارب 46 کروڑ ڈالر تک پہنچ گیا ہے۔
برآمدات میں کمی
ادارہ شماریات کے مطابق پہلے پانچ ماہ کے دوران ملکی برآمدات میں 87 کروڑ 70 لاکھ ڈالر کی کمی واقع ہوئی،
گزشتہ سال اس مدت میں برآمدات 13.72 ارب ڈالر تھیں
جبکہ رواں سال یہ کم ہو کر 12.84 ارب ڈالر تک محدود رہ گئیں
برآمدات میں مجموعی کمی 6.39 فیصد ریکارڈ کی گئی
درآمدات میں اضافہ
رپورٹ میں بتایا گیا کہ جولائی تا نومبر کے دوران درآمدات میں 13.26 فیصد اضافہ ہوا ہے،
جس کے بعد درآمدات کا حجم بڑھ کر 28.31 ارب ڈالر ہوگیا۔
تجزیہ کاروں کے مطابق مسلسل گرنے والی برآمدات اور بڑھتی ہوئی درآمدات ملکی معیشت کے لیے تشویشناک صورتحال کی نشاندہی کرتی ہیں، جبکہ آنے والے مہینوں میں تجارتی پالیسیوں پر مزید دباؤ بڑھنے کا امکان ہے۔
