افواجِ پاکستان کی جانب سے لانس نائیک محمد محفوظ شہیدؒ، نشانِ حیدر کو خراجِ عقیدت
راولپنڈی(بولونیوز) فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف اور چیف آف ڈیفنس فورسز؛ ایڈمرل نوید اشرف، نشانِ امتیاز، نشانِ امتیاز (ملٹری)، چیف آف دی نیول اسٹاف؛ اور ائیر چیف مارشل ظہیر احمد بابر سدھو، نشانِ امتیاز (ملٹری)، ہلالِ جرات، چیف آف ائیر اسٹاف نے افواجِ پاکستان کی جانب سے لانس نائیک محمد محفوظ شہیدؒ، نشانِ حیدر کو اُن کی شہادت کی برسی کے موقع پر گہرا خراجِ عقیدت پیش کیا ہے۔
افواجِ پاکستان کے سربراہان نے اپنے پیغام میں کہا کہ لانس نائیک محمد محفوظ شہیدؒ بہادری، قربانی اور مادرِ وطن سے بے لوث محبت کی عظیم مثال ہیں۔ 1971 کی جنگ کے دوران واہگہ سیکٹر پر دشمن کی شدید مزاحمت کے باوجود انہوں نے غیر معمولی جرات اور بے مثال دلیری کا مظاہرہ کیا۔ شدید زخمی ہونے اور مسلسل دشمن کی فائرنگ کے باوجود انہوں نے پیش قدمی جاری رکھی اور اعلیٰ عسکری روایات کے مطابق جامِ شہادت نوش کیا۔
پیغام میں کہا گیا کہ شہید کی عظیم قربانی ناقابلِ تسخیر عزم، پیشہ ورانہ مہارت اور بے لوثی کی عکاس ہے جو افواجِ پاکستان کا امتیاز ہے۔ لانس نائیک محمد محفوظ شہیدؒ کی بہادری وقت کی قید سے آزاد ہے اور یہ آنے والی نسلوں، خواہ وہ فوجی ہوں یا شہری، سب کے لیے مشعلِ راہ ہے۔ ان کی قربانی مسلح افواج اور قوم کے درمیان اس مقدس رشتے کو مزید مضبوط کرتی ہے جس کے دفاع کا عہد کیا جاتا ہے۔
اس موقع پر افواجِ پاکستان نے ملک کی خودمختاری، علاقائی سالمیت اور سلامتی کے تحفظ کے لیے اپنے غیر متزلزل عزم کا اعادہ کیا۔ پیغام میں کہا گیا کہ لانس نائیک محمد محفوظ شہیدؒ کی لازوال وراثت ہمیشہ قوم کی اجتماعی یادداشت میں زندہ رہے گی اور ان کی قربانی ہمت، استقامت اور ایثار کی روشن علامت کے طور پر تاریخ میں سنہری حروف سے لکھی جائے گی۔
