پی آئی اے کے نئے سی ای او کے طور پر تولدے گیبریماریم مقرر
اسلام آباد(بولونیوز) پاکستان انٹرنیشنل ایئرلائنز (پی آئی اے) نے ایتھوپین ایئرلائنز کے سابق سربراہ تولدے گیبریماریم کو اپنا نیا چیف ایگزیکٹو آفیسر (سی ای او) مقرر کر دیا ہے۔
ذرائع کے مطابق تولدے گیبریماریم کی قیادت میں ایتھوپین ایئرلائنز نے نمایاں ترقی کرتے ہوئے افریقہ کی سب سے بڑی فضائی کمپنی کا اعزاز حاصل کیا تھا۔
پی آئی اے کے ایک اعلیٰ عہدیدار نے ان کی تقرری کی تصدیق کرتے ہوئے بتایا کہ ایئرلائن کی بہتری، جدید انتظامی اصلاحات اور عالمی معیار کے مطابق آپریشنز کو فروغ دینے کے لیے تولدے گیبریماریم کو ادارے کی قیادت سونپی گئی ہے۔
امید ظاہر کی جا رہی ہے کہ نئے سی ای او کی تقرری سے پی آئی اے کی کارکردگی میں بہتری آئے گی اور قومی ایئرلائن کو بین الاقوامی سطح پر مزید مستحکم بنانے میں مدد ملے گی۔
