انمول عرف پنکی کے مبینہ شوہر رانا اکرم کے خلاف مقدمہ درج، تفتیش جاری
لاہور(بولونیوز)نواب ٹاؤن تھانے میں ریٹائرڈ پولیس افسر اور انمول عرف پنکی کے مبینہ شوہر رانا اکرم کے خلاف مقدمہ درج کر لیا گیا ہے۔
پولیس کے مطابق یہ مقدمہ سی سی پی او کی ہدایت پر کی گئی انکوائری کے بعد درج کیا گیا۔ ایف آئی آر میں الزام عائد کیا گیا ہے کہ رانا اکرم نے مبینہ طور پر شکایت کنندہ کے گھر میں زبردستی داخل ہو کر توڑ پھوڑ کی۔
ایف آئی آر کے متن کے مطابق ملزم پر شکایت کنندہ کے شوہر پر تشدد کرنے کا بھی الزام ہے، جبکہ 55 لاکھ روپے مالیت کے زیورات، 8 لاکھ روپے نقدی اور دیگر قیمتی سامان زبردستی لے جانے کا الزام بھی عائد کیا گیا ہے۔
مزید یہ کہ ایف آئی آر میں گاڑی لے جانے کا الزام بھی شامل کیا گیا ہے، جبکہ شکایت کنندہ نے ملزم پر اپنے خلاف جھوٹا مقدمہ درج کرانے کی کوشش کا الزام بھی لگایا ہے۔
پولیس کا کہنا ہے کہ چونکہ ملزم ایک ریٹائرڈ پولیس افسر ہے، اس لیے معاملے کی تفتیش انتہائی احتیاط اور میرٹ پر کی جا رہی ہے۔ نواب ٹاؤن پولیس کے مطابق تمام الزامات کا جائزہ لیا جا رہا ہے اور تفتیش مکمل ہونے کے بعد مزید قانونی کارروائی عمل میں لائی جائے گی۔
