اوگرا نے درآمدی آر ایل این جی کی قیمتوں میں اضافہ کر دیا
اسلام آباد(بولونیوز)اوگرا نے درآمدی ری گیسیفائیڈ لیکویفائیڈ نیچرل گیس (آر ایل این جی) کی قیمتوں میں اضافہ کرتے ہوئے نیا نوٹیفکیشن جاری کر دیا ہے۔
اوگرا کے مطابق قیمتوں میں یہ اضافہ پاکستان اسٹیٹ آئل (پی ایس او) کے تین جبکہ پاکستان ایل این جی لمیٹڈ (پی ایل ایل) کے ایک درآمدی کارگو کی بنیاد پر کیا گیا ہے۔
جاری کردہ نوٹیفکیشن کے مطابق سوئی ناردرن گیس کے صارفین کے لیے آر ایل این جی کی قیمت میں 14.94 فیصد اضافہ کر دیا گیا ہے، جس کے بعد نئی قیمت 19.52 ڈالر فی ایم بی ٹی یو مقرر کر دی گئی ہے۔ اس سے قبل مئی میں آر ایل این جی کی قیمت 16.98 ڈالر فی ایم بی ٹی یو تھی۔
اوگرا کا کہنا ہے کہ عالمی منڈی میں ایل این جی کی قیمتوں میں اتار چڑھاؤ کے باعث درآمدی لاگت میں اضافہ ہوا، جس کا اثر مقامی صارفین تک منتقل کیا گیا ہے۔
