سانحہ جھیل سیف اللہ، (ر) کمانڈر عامر ہندل کے برادر نسبتی نے قتل کا شبہ ظاہر کر دیا
خیبرپختونخوا(بولونیوز)سانحہ جھیل سیف اللہ میں اہلِ خانہ سمیت جاں بحق ہونے والے پاک بحریہ کے ریٹائرڈ افسر عامر ہندل کے برادر نسبتی نوید چیمہ نے واقعے کو محض حادثہ قرار دینے سے انکار کرتے ہوئے قتل کا شبہ ظاہر کیا ہے اور واقعے کی مکمل تحقیقات کا مطالبہ کیا ہے۔
میڈیا سے گفتگو کرتے ہوئے نوید چیمہ کا کہنا تھا کہ اس سانحے کے پیچھے حکومت کی شدید نااہلی بھی شامل ہے۔ اگر جھیل میں طغیانی اور خطرناک صورتحال تھی تو سیاحوں کو پیشگی آگاہ کیوں نہیں کیا گیا؟ دنیا بھر میں تفریحی مقامات پر حفاظتی ہدایات اور احتیاطی تدابیر واضح طور پر درج ہوتی ہیں، مگر یہاں نہ لائف جیکٹس فراہم کی گئیں اور نہ ہی کسی قسم کی رہنمائی کی گئی۔
انہوں نے کہا کہ جس مقام پر حادثہ پیش آیا وہاں ایف آئی آر لانچ موجود تھی، مگر اس کے باوجود یہ واضح نہیں کہ کیا تحقیقات ہوئیں۔ متاثرہ خاندان کو کسی قسم کی معلومات فراہم نہیں کی گئیں۔ ان کا کہنا تھا کہ وہ اس معاملے پر خاموش نہیں بیٹھیں گے اور مکمل انوسٹی گیشن کروائیں گے کیونکہ اس سانحے میں ان کی تین نسلیں ختم ہو گئیں۔
نوید چیمہ نے ریسکیو عمل پر بھی سوالات اٹھاتے ہوئے کہا کہ ریسکیو 1122 جب لاشیں منتقل کر رہی تھی تو راستے میں گاڑی کا پٹرول ختم ہو گیا، جو ایک سنگین غفلت ہے۔ انہوں نے مزید بتایا کہ عامر ہندل کی بیٹیاں اور ایک نواسہ ریسکیو کے وقت سانس لے رہے تھے اور بچے کو سی پی آر دینے کی فوٹیج بھی موجود ہے۔ اگر بروقت اور مؤثر طبی امداد ملتی تو شاید جانیں بچ سکتی تھیں۔
انہوں نے الزام عائد کیا کہ عامر ہندل کا فیملی کے ساتھ جائیداد کا تنازعہ چل رہا تھا اور انہیں قتل کی دھمکیاں بھی دی جا رہی تھیں۔ ان کا کہنا تھا کہ عامر ہندل کے ایک بھتیجے نے ان کے فارم ہاؤس پر قبضہ کر رکھا تھا اور وہاں مبینہ طور پر نشے کا اڈا قائم کیا گیا تھا، جس کے خلاف عامر ہندل نے آر پی او کو باقاعدہ درخواست بھی دی ہوئی تھی۔
نوید چیمہ نے مطالبہ کیا کہ اس واقعے کی تمام پہلوؤں سے تحقیقات کی جائیں اور دونوں صوبوں کی پولیس مشترکہ انکوائری کرے تاکہ اصل حقائق سامنے آ سکیں۔
واضح رہے کہ یکم جولائی کو لاہور سے تعلق رکھنے والے عامر ہندل اپنے اہلِ خانہ کے ہمراہ مہوڈنڈ کے علاقے میں واقع جھیل سیف اللہ میں کشتی کی سیر کر رہے تھے کہ کشتی الٹ گئی۔ حادثے میں چھ افراد جاں بحق ہوئے، جن میں سابق لیفٹیننٹ کمانڈر عامر ہندل، ان کا 20 سالہ بیٹا عبداللہ ہندل، 27 سالہ بیٹی پروا ہندل، 23 سالہ بیٹی رویل ہندل اور پروا ہندل کے دو کمسن بچے شامل ہیں۔
