لاہور(بولونیوز)لاہور ہائیکورٹ کی چیف جسٹس عالیہ نیلم نے 20 ایڈیشنل ڈسٹرکٹ اینڈ سیشن ججز کو ترقی دے کر ڈسٹرکٹ اینڈ سیشن ججز کے عہدے پر فائز کر دیا ہے۔
اس حوالے سے باقاعدہ نوٹیفکیشن جاری کر دیا گیا ہے۔ نوٹیفکیشن کے مطابق ترقی پانے والے ججز اپنی نئی ذمہ داریاں فوری طور پر سنبھالیں گے۔
عدالتی حلقوں کے مطابق ان ترقیوں سے ماتحت عدلیہ کے انتظامی اور عدالتی امور میں بہتری آئے گی اور زیر التوا مقدمات کے بروقت فیصلوں میں بھی مدد ملے گی۔
لاہور(بولونیوز)پنجاب حکومت نے صوبہ بھر میں مزید الیکٹرک بسیں، ای ٹیکسیاں، ای بائیکس اور ای تھری وہیلرز متعارف کروانے کا فیصلہ کرلیا ہے۔ اس اقدام کا مقصد ماحول دوست سفری سہولیات کو فروغ دینا، ایندھن کے اخراجات میں کمی اور فضائی آلودگی پر قابو پانا ہے۔
حکومتی ذرائع کے مطابق طالبات کے لیے خصوصی سہولت کے تحت ای بائیکس کی ڈاؤن پیمنٹ اور رجسٹریشن فیس مریم نواز شریف خود ادا کریں گی، تاکہ طالبات کو تعلیم کے حصول میں آسانی فراہم کی جا سکے۔
اسی طرح پنجاب کے سرکاری ملازمین کو بھی آسان اقساط پر ای بائیکس فراہم کی جائیں گی، جس سے روزمرہ سفری مسائل میں کمی اور مالی بوجھ کم ہوگا۔
صوبائی حکومت کا کہنا ہے کہ الیکٹرک ٹرانسپورٹ منصوبوں سے نہ صرف عوام کو سستی اور جدید سفری سہولیات میسر آئیں گی بلکہ ماحولیاتی تحفظ کے اہداف کے حصول میں بھی مدد ملے گی۔
اسلام آباد(بولونیوز) ہائیکورٹ میں موسمِ گرما کی دو ماہ پر مشتمل تعطیلات کل بروز یکم جولائی سے شروع ہوں گی۔ عدالتی ذرائع کے مطابق تعطیلات کے دوران بھی اہم نوعیت کے مقدمات کی سماعت جاری رہے گی۔
ذرائع کا کہنا ہے کہ اسلام آباد ہائیکورٹ کے چیف جسٹس سردار محمد سرفراز ڈوگر تعطیلات کے دوران دستیاب ہوں گے اور وہ کوئی چھٹی نہیں کریں گے۔
عدالتی امور سے وابستہ حلقوں کے مطابق چیف جسٹس کی دستیابی کے باعث فوری اور اہم نوعیت کے کیسز پر سماعت ممکن ہو سکے گی، جس سے سائلین کو ریلیف ملنے کی توقع ہے۔
اسلام آباد(بولونیوز)سپریم کورٹ نے جہیز اور شادی میں دیے جانے والے زیورات کے حوالے سے ایک اہم اور واضح فیصلہ جاری کر دیا ہے۔عدالتی فیصلے کے مطابق شادی کے موقع پر دلہن کو ملنے والے تمام زیورات، تحائف اور جہیز دلہن کی ذاتی اور مکمل ملکیت ہوں گے۔ عدالت نے واضح کیا کہ شوہر، ساس، سسر یا دیگر سسرالی رشتہ داروں کو دلہن کے زیورات پر کسی قسم کا قانونی یا ملکیتی حق حاصل نہیں۔
سپریم کورٹ نے اپنے فیصلے میں کہا کہ شوہر یا سسرال کے افراد دلہن کے زیورات پر قبضہ نہیں کر سکتے اور نہ ہی ان کا ناجائز استعمال قانوناً جائز ہے۔ اگر دلہن کے زیورات زبردستی رکھے جائیں یا واپس نہ کیے جائیں تو یہ عمل قانونی خلاف ورزی تصور ہوگا۔
عدالت کے مطابق یہ فیصلہ خواتین کے مالی حقوق کے تحفظ اور معاشرے میں پائے جانے والے غلط رجحانات کے خاتمے کے لیے ایک اہم قدم ہے۔ قانونی ماہرین کا کہنا ہے کہ اس فیصلے سے خواتین کو اپنے حقوق کے تحفظ میں مزید سہولت حاصل ہوگی۔
کراچی(بولونیوز) سندھ بھر میں سی این جی اسٹیشنز کی طویل بندش کے خلاف آل پاکستان سی این جی ایسوسی ایشن نے پریس کانفرنس کرتے ہوئے شدید تشویش کا اظہار کیا ہے۔ ایسوسی ایشن کے مطابق سندھ میں گزشتہ چار ماہ سے سی این جی اسٹیشنز بند ہیں، جس کے باعث ہزاروں افراد بے روزگار ہو چکے ہیں۔
ترجمان نے بتایا کہ 28 فروری سے 29 جون تک سندھ میں سی این جی کو گیس کی فراہمی معطل رہی، جس سے سی این جی اسٹیشنز پر کام کرنے والے ملازمین، مکینکس اور ڈرائیورز شدید متاثر ہوئے ہیں۔ سی این جی سیکٹر سے وابستہ خاندان اس وقت سنگین معاشی مشکلات کا شکار ہیں۔
آل پاکستان سی این جی ایسوسی ایشن کے مطابق سی این جی سیکٹر کا مجموعی گیس استعمال صرف 1.5 ایم سی ایف ڈی ہے، جو ملک کے کل گیس نیٹ ورک کا محض 0.1 فیصد بنتا ہے، اس کے باوجود اس شعبے کو مکمل طور پر بند رکھا گیا ہے۔
ایسوسی ایشن نے مطالبہ کیا کہ روزگار کے تحفظ کے لیے متبادل پالیسی اختیار کی جائے اور سندھ کے تمام سی این جی اسٹیشنز کو فوری طور پر گیس کی فراہمی یقینی بنائی جائے۔ ترجمان نے سی این جی کو ماحول دوست اور سستا ایندھن قرار دیتے ہوئے اس کی بحالی پر زور دیا۔
آل پاکستان سی این جی ایسوسی ایشن نے خبردار کیا کہ اگر مطالبات تسلیم نہ کیے گئے تو وہ احتجاج پر مجبور ہوں گے۔
کراچی(بولونیوز)حکومتِ سندھ کے محکمہ ورکس اینڈ سروسز سندھ نے گریڈ 18 کے ایگزیکٹو انجینئرز کے تقرر و تبادلوں کا باقاعدہ نوٹیفکیشن جاری کر دیا ہے۔
نوٹیفکیشن کے مطابق ترقی پانے والے ریاض احمد مگسی کو ایگزیکٹو انجینئر، پروونشل ہائی ویز ڈویژن خیرپور تعینات کر دیا گیا ہے۔
اسی طرح سرمد علی شاہ کا تبادلہ کرتے ہوئے انہیں پروونشل ہائی ویز ڈویژن بدین کا ایگزیکٹو انجینئر مقرر کیا گیا ہے۔ سعید احمد سنانی بلادی کو پروونشل ہائی ویز ڈویژن قمبر شہدادکوٹ میں تعینات کیا گیا، جبکہ خادم حسین کلواڑ کو اس عہدے کے اضافی چارج سے فارغ کر دیا گیا ہے۔
مزید برآں راجہ اوڈ کا ایگزیکٹو انجینئر بلڈنگز ڈویژن سانگھڑ سے تبادلہ کر دیا گیا ہے، جبکہ انہیں چیف انجینئر (ہائی ویز) شہید بینظیرآباد کے تحت ایگزیکٹو انجینئر کے عہدے کا اضافی چارج بھی سونپ دیا گیا ہے۔
محکمہ ورکس اینڈ سروسز کے مطابق ان تقرر و تبادلوں کا مقصد انتظامی امور کو بہتر بنانا اور ترقیاتی منصوبوں کی رفتار کو تیز کرنا ہے۔
کراچی(بولونیوز) پاکستان انٹرنیشنل ایئرلائنز (پی آئی اے) کی جانب سے لاہور سے مانچسٹر کے لیے دو طرفہ پروازیں پانچ سال بعد بحال کی جا رہی ہیں، جبکہ اسلام آباد سے بیجنگ کی معطل دو طرفہ پروازیں بھی دو ماہ بعد دوبارہ شروع کرنے کا اعلان کیا گیا ہے۔
پی آئی اے کے مطابق لاہور سے مانچسٹر کے لیے دو طرفہ پروازوں کا آغاز یکم جولائی سے ہوگا۔ مانچسٹر سے لاہور کی پرواز یکم جولائی جبکہ لاہور سے مانچسٹر جانے والی پرواز 2 جولائی کو آپریٹ کی جائے گی۔
ذرائع کے مطابق بوئنگ 777 طیارے پر مشتمل لاہور تا مانچسٹر پرواز پر 175 مسافروں کی بکنگ کنفرم ہے، جبکہ 2 جولائی کو لاہور سے مانچسٹر جانے والی پرواز کی تمام 310 نشستیں مکمل طور پر بک ہو چکی ہیں۔
واضح رہے کہ پی آئی اے کی برطانیہ کے لیے پروازوں پر 2020 میں پابندی عائد کی گئی تھی، تاہم گزشتہ برس اسلام آباد سے مانچسٹر کی پروازیں بحال کی گئی تھیں۔
دوسری جانب مشرقِ وسطیٰ میں جنگی صورتحال کے باعث اسلام آباد سے بیجنگ کے لیے معطل پروازیں 3 جولائی سے دوبارہ بحال کی جا رہی ہیں۔ پی آئی اے کے مطابق 10 اپریل سے معطل ہفتہ وار ایک دو طرفہ پرواز کے لیے بوئنگ 777 طیارہ استعمال کیا جائے گا۔
پی آئی اے انتظامیہ کا کہنا ہے کہ بین الاقوامی پروازوں کی بحالی سے مسافروں کو سہولت ملے گی اور قومی ایئرلائن کے ریونیو میں بھی اضافہ ہوگا۔
اسلام آباد(بولونیوز)اسٹیٹ بینک آف پاکستان نے اعلان کیا ہے کہ یکم جولائی 2026ء بروز بدھ بینک تعطیل کے باعث ملک بھر کے بینک عوامی لین دین کے لیے بند رہیں گے۔
اسٹیٹ بینک کی جانب سے جاری بیان کے مطابق اس روز تمام بینک، ترقیاتی مالی ادارے اور مائیکروفنانس بینک عوام سے لین دین کے لیے بند رہیں گے۔ تاہم بینکوں، ترقیاتی مالی اداروں اور مائیکروفنانس بینکوں کے ملازمین حسبِ معمول دفاتر میں حاضر ہوں گے اور اندرونی امور سرانجام دیں گے۔
اعلامیے میں مزید کہا گیا ہے کہ بینک تعطیل کا اطلاق صرف عوامی لین دین پر ہوگا، جبکہ بینکاری نظام سے متعلق دیگر انتظامی سرگرمیاں معمول کے مطابق جاری رہیں گی۔
لاہور(بولونیوز) نااہلی، بدعنوانی اور اختیارات سے تجاوز کے الزامات پر ڈی ایس پی آپریشنز سول لائنز خرم شہزاد چیمہ کو معطل کر دیا گیا ہے۔ اس حوالے سے باقاعدہ نوٹیفیکیشن جاری کر دیا گیا ہے۔
نوٹیفیکیشن کے مطابق ابتدائی انکوائری اور دستیاب شواہد کی روشنی میں افسر کی کارکردگی اور طرزِ عمل کو قواعد و ضوابط کے منافی قرار دیا گیا، جس کے بعد انہیں عہدے سے ہٹا کر معطلی کے احکامات جاری کیے گئے۔
حکام کے مطابق معاملے کی مزید تحقیقات جاری ہیں اور انکوائری مکمل ہونے کے بعد قانون کے مطابق آئندہ کی کارروائی عمل میں لائی جائے گی۔ انتظامیہ کا کہنا ہے کہ پولیس محکمے میں نظم و ضبط، شفافیت اور قانون کی بالادستی پر کوئی سمجھوتہ نہیں کیا جائے گا۔
لاہور(بولونیوز)حکومت پنجاب نے ای ٹیکسی اسکیم کے تحت گاڑیاں حاصل کرنے والے افراد کی جانچ پڑتال کرنے کا فیصلہ کر لیا ہے۔ حکام کے مطابق ای ٹیکسی اسکیم کا مقصد روزگار کے مواقع فراہم کرنا اور عوام کو سفری سہولت دینا ہے، تاہم بعض افراد کی جانب سے گاڑیاں گھریلو استعمال میں لانے کی شکایات سامنے آئی ہیں۔
ذرائع کے مطابق حکومت نے فیصلہ کیا ہے کہ ای ٹیکسی اسکیم کی گاڑیاں ذاتی یا گھریلو استعمال کرنے والوں کے خلاف کارروائی کی جائے گی۔ اس ضمن میں متعلقہ محکموں کو ہدایت جاری کی جا رہی ہیں کہ اسکیم سے فائدہ اٹھانے والوں کے کوائف اور گاڑیوں کے استعمال کی مکمل جانچ پڑتال کی جائے۔
حکام کا کہنا ہے کہ جن افراد کی جانب سے اسکیم کے قواعد و ضوابط کی خلاف ورزی ثابت ہوئی، ان کے خلاف قانونی کارروائی کے ساتھ ساتھ ای ٹیکسی واپس لینے کا اختیار بھی استعمال کیا جا سکتا ہے۔ حکومت پنجاب کے مطابق اس اقدام کا مقصد شفافیت کو یقینی بنانا اور اسکیم کے اصل مستحق افراد تک فائدہ پہنچانا ہے۔