تمام فریقین کو جنگ بندی معاہدے کی مکمل پاسداری کرنی چاہیے، اسحاق ڈار
اسلام آباد(بولونیوز)پاکستان کے نائب وزیر اعظم اور وزیر خارجہ اسحاق ڈار نے اس بات پر زور دیا ہے کہ جنگ بندی معاہدے پر مکمل اور مؤثر عمل درآمد کو ہر صورت یقینی بنایا جانا چاہیے۔
پاکستانی وزارتِ خارجہ کی جانب سے جاری بیان کے مطابق اسحاق ڈار نے یورپی یونین کی خارجہ پالیسی کی سربراہ کایا کلاس سے ٹیلی فونک گفتگو کی، جس کے دوران دونوں رہنماؤں نے خطے کی تیزی سے بدلتی ہوئی صورتحال کا تفصیلی جائزہ لیا۔
بیان میں کہا گیا ہے کہ کایا کلاس نے اسلام آباد مفاہمتی یادداشت تک پہنچنے میں پاکستان کی مخلصانہ اور تعمیری کوششوں کو سراہا، تاہم انہوں نے حالیہ جنگ بندی کی خلاف ورزیوں پر شدید تشویش کا اظہار بھی کیا۔
گفتگو کے دوران اسحاق ڈار نے اس بات پر زور دیا کہ پائیدار امن کے قیام کے لیے تمام فریقین کو جنگ بندی معاہدے کی مکمل پاسداری کرنی چاہیے اور کشیدگی میں اضافے سے گریز کرنا ناگزیر ہے۔
