ہاکی پرو لیگ میچ میں پاکستانی پرچم کی غلط نمائش، انٹرنیشنل ہاکی فیڈریشن کی معذرت
لندن(بولونیوز)انگلینڈ میں منعقدہ ہاکی پرو لیگ میچ کے دوران پاکستانی پرچم کی غلط نمائش کے معاملے پر انٹرنیشنل ہاکی فیڈریشن (FIH) نے پاکستان ہاکی فیڈریشن سے باضابطہ معذرت کر لی ہے۔
انٹرنیشنل ہاکی فیڈریشن (FIH) کی ہاکی پرو لیگ کی ڈائریکٹر ہلیری اٹکنسن نے پاکستان ہاکی فیڈریشن کے صدر محی الدین احمد وانی کو ایک خط ارسال کیا، جس میں اس غلطی پر گہرے افسوس کا اظہار کیا گیا۔
خط میں کہا گیا کہ میچ کے دوران پاکستانی قومی پرچم کی غلط نمائش ایک غیر ارادی غلطی تھی، جس پر ادارہ غیر مشروط معذرت کرتا ہے۔
پاکستان ہاکی فیڈریشن کے مطابق انٹرنیشنل ہاکی فیڈریشن نے اس واقعے کو سنجیدگی سے لیتے ہوئے یقین دہانی کرائی ہے کہ آئندہ اس نوعیت کی غلطی نہیں دہرائی جائے گی۔
