مشرقِ وسطیٰ میں کشیدگی: ایران، عراق اور شام نے فضائی حدود بند کر دیں، دمشق ایئرپورٹ پر پروازیں معطل
تہران(بولونیوز)مشرقِ وسطیٰ میں بڑھتی ہوئی کشیدگی کے دوران متعدد ممالک نے فضائی حدود پر پابندیاں عائد کر دی ہیں، جبکہ ایران، عراق اور شام میں فضائی آپریشنز متاثر ہوئے ہیں۔
غیر ملکی خبر ایجنسیوں کے مطابق ایران نے اپنے مغربی علاقوں کی فضائی حدود غیر معینہ مدت کے لیے بند کر دی ہے، جبکہ عراق نے بھی سیکیورٹی خدشات کے پیش نظر اپنی فضائی حدود عارضی طور پر بند کرنے کا اعلان کیا ہے۔
شامی حکام کے مطابق جنوبی فضائی حدود کو 12 گھنٹوں کے لیے بند کیا گیا ہے، جبکہ دارالحکومت دمشق بین الاقوامی ہوائی اڈہ پر تمام فضائی سرگرمیاں عارضی طور پر معطل کر دی گئی ہیں۔
ادھر مقبوضہ بیت المقدس میں موجود امریکی سفارتخانہ نے اپنے عملے اور ان کے اہل خانہ کو سیکیورٹی صورتحال کے پیش نظر محفوظ مقامات پر منتقل ہونے اور احتیاطی تدابیر اختیار کرنے کی ہدایت جاری کی ہے۔
رپورٹس کے مطابق امریکی صدر ڈونلڈ ٹرمپ کی جانب سے تحمل کی اپیل کے باوجود خطے میں کشیدگی میں اضافہ دیکھا جا رہا ہے، اور مختلف مقامات پر دھماکوں کی اطلاعات بھی موصول ہوئی ہیں۔
ایرانی میڈیا کے مطابق تہران، تبریز اور اصفہان سمیت مختلف شہروں میں دھماکوں کی آوازیں سنی گئی ہیں، جبکہ کرج کے قریب بھی دھماکوں کی اطلاعات سامنے آئی ہیں۔
اسرائیلی فوج کا کہنا ہے کہ اس نے مغربی اور وسطی ایران میں فوجی اہداف کو نشانہ بنایا ہے، اور یہ کارروائی ایران کی جانب سے کیے گئے حملوں کے جواب میں کی گئی۔
علاقائی صورتحال میں تیزی سے تبدیلی کے باعث عالمی فضائی کمپنیوں اور مسافروں کو احتیاط برتنے کی ہدایت کی جا رہی ہے، جبکہ ماہرین کے مطابق اگر کشیدگی برقرار رہی تو اس کے اثرات عالمی فضائی اور توانائی نظام پر بھی پڑ سکتے ہیں۔
