ایف سی کی انسدادِ اسمگلنگ اور منشیات کارروائی، دہشت گرد نیٹ ورکس کو شدید نقصان
بلوچستان(بولونیوز)ایف سی بلوچستان (ساؤتھ) نے جنوبی بلوچستان کے مختلف اضلاع میں بڑے پیمانے پر اسمگلنگ اور منشیات کے خلاف کارروائیاں کیں، جس سے غیر قانونی نیٹ ورکس اور دہشت گرد گروہوں کو شدید نقصان پہنچا۔
سیکیورٹی ذرائع کے مطابق یہ کارروائیاں نہ صرف جرائم کی کمر توڑنے کے لیے اہم ہیں بلکہ دہشت گرد تنظیموں جیسے کہ بی ایل اے کو مالی وسائل سے محروم کرنے کے لیے بھی انتہائی ضروری ہیں، کیونکہ اسمگل شدہ اشیاء اور منشیات کی آمدن اکثر ان دہشت گرد گروہوں تک جاتی ہے۔
ذرائع نے بتایا کہ ایف سی نے حالیہ ہفتوں میں متعدد حساس علاقوں میں چھاپے مار کر غیر قانونی سامان ضبط کیا اور متعدد مشکوک افراد کو گرفتار کیا۔ ابتدائی فرانزک رپورٹوں میں یہ بھی سامنے آیا کہ منشیات اور اسمگل اشیاء کی ترسیل کے لیے بنائے گئے خفیہ راستے اور محفوظ ٹھکانے بلوچستان کے کچھ علاقوں میں دہشت گردانہ سرگرمیوں کی معاونت کر رہے تھے۔
ماہرین کا کہنا ہے کہ منشیات اور اسمگلنگ کے خاتمے کے بغیر صوبے میں دیرپا امن قائم کرنا ناممکن ہے، کیونکہ یہ غیر قانونی دھندے نہ صرف مقامی نوجوانوں کو بری عادات میں مبتلا کرتے ہیں بلکہ دہشت گرد گروہوں کو مالی اور تکنیکی مدد فراہم کرتے ہیں۔
ایف سی کے اہلکاروں نے متعدد علاقوں میں براہِ راست کارروائی کر کے ان نیٹ ورکس کو ناکام بنایا اور سخت سیکیورٹی اقدامات نافذ کیے۔ سیکیورٹی ذرائع کے مطابق اس آپریشن کے دوران صوبے میں غیر قانونی فصلوں، منشیات کے ڈپو اور اسمگلنگ کے راستوں کی نشاندہی کی گئی، جس سے بی ایل اے اور دیگر دہشت گرد تنظیموں کے مالی وسائل متاثر ہوئے۔
صوبائی انتظامیہ نے ایف سی کی کارروائیوں کی تعریف کرتے ہوئے کہا کہ یہ اقدامات عوام کے جان و مال کے تحفظ کے لیے انتہائی ضروری ہیں اور مستقبل میں ایسے اقدامات مزید تیز کیے جائیں گے تاکہ بلوچستان میں امن، ترقی اور استحکام قائم رہے۔
