سندھ ہائیکورٹ بار ایسوسی ایشن کی مینجنگ کمیٹی کا اجلاس، 26، 27 آئینی ترمیم کی متفقہ مذمت

کراچی(بولونیوز)سندھ ہائیکورٹ بار ایسوسی ایشن کے صدر حسیب جمالی کی سربراہی میں مینجنگ کمیٹی کا پہلا اجلاس منعقد ہوا، جس میں اہم آئینی معاملات پر غور کیا گیا۔ اجلاس کے بعد جاری اعلامیے میں 26ویں اور 27ویں آئینی ترمیم کو متفقہ طور پر مسترد کرتے ہوئے شدید مذمت کی گئی۔

اعلامیے کے مطابق 26ویں اور 27ویں آئینی ترامیم آئین کے بنیادی ڈھانچے، عدلیہ کی آزادی اور جمہوری اصولوں کے منافی ہیں۔ ہائیکورٹ بار نے مؤقف اختیار کیا کہ یہ ترامیم بنیادی انسانی حقوق کے بھی خلاف جاتی ہیں۔

بار ایسوسی ایشن نے وفاقی حکومت سے مطالبہ کیا کہ وہ ان ترامیم پر فوری طور پر نظرِ ثانی کرے اور انہیں واپس لے کر آئینی و جمہوری نظام کو مضبوط بنانے کے لیے اقدامات کرے۔