ای-چالان سسٹم کے تحت کراچی آنے والی انٹر سٹی بسوں کیلئے ایک اور مشکل
کراچی(بولونیوز)انٹر سٹی بسوں کے خلاف بڑے پیمانے پر ای ٹکٹ کا اجرا شروع کر دیا گیا ہے، جس کے بعد شہر میں آنے والی بین الاضلاعی بسوں کے آپریٹرز کیلئے نئی مشکل کھڑی ہوگئی ہے۔
ترجمان ٹریفک پولیس کے مطابق وہ تمام انٹرسٹی بسیں جو سہراب گوٹھ بس ٹرمینل یا کراچی بس ٹرمینل کے قواعد کی خلاف ورزی کرتے ہوئے براہ راست شہر کے اندر داخل ہوتی ہیں، ان کے خلاف ای چالان جاری کیا جا رہا ہے۔ ٹریفک پولیس نے واضح کیا کہ مقررہ روٹس اور ٹرمینلز کے برعکس شہر میں داخل ہونا قانون کی خلاف ورزی ہے، جس پر سخت کارروائی کی جائے گی۔
حکام کے مطابق خلاف ورزی کرنے والے ڈرائیورز کے خلاف نہ صرف ای ٹکٹ جاری کیا جائے گا بلکہ ان کے خلاف مزید قانونی کارروائی بھی کی جائے گی۔ مسلسل خلاف ورزی کرنے والی گاڑیوں اور ڈرائیورز کے خلاف اضافی سزائیں اور جرمانے بھی لاگو کیے جائیں گے۔
ٹریفک پولیس کا کہنا ہے کہ قواعد پر عمل درآمد شہری ٹریفک کے نظام کو بہتر بنانے کے لیے ضروری ہے اور کسی قسم کی نرمی نہیں برتی جائے گی۔
