لاپتا شہری محمد بلال اور دیگر کی بازیابی سے متعلق درخواستوں پر سماعت
کراچی(بولونیوز)سندھ ہائی کورٹ میں لاپتا شہری محمد بلال اور دیگر افراد کی بازیابی سے متعلق درخواستوں کی سماعت ہوئی۔ عدالت نے محکمہ داخلہ سندھ، آئی جی سندھ اور دیگر متعلقہ حکام کو نوٹسز جاری کردیے۔
عدالت نے تمام فریقین سے 18 دسمبر تک جواب طلب کرلیا۔
درخواست گزار کے وکیل نے عدالت کو بتایا کہ محمد بلال سپر ہائی وے کے قریب انٹرویو کے لیے گئے تھے تاہم اس کے بعد ان کے فون بند ہوگئے اور وہ گھر واپس نہیں آئے۔
جسٹس یوسف علی سعید نے استفسار کیا کہ کیا بلال کی گمشدگی کا مقدمہ درج کرایا گیا ہے؟
وکیل نے جواب میں بتایا کہ متعلقہ تھانے میں گمشدگی کا مقدمہ درج کرلیا گیا ہے تاہم اب تک کسی قسم کا سراغ نہیں مل سکا۔
عدالت نے معاملے پر متعلقہ حکام سے رپورٹ طلب کرتے ہوئے سماعت آئندہ تاریخ تک ملتوی کردی۔
