غیر قانونی مقیم افغان باشندوں کے خلاف کریک ڈاؤن، 1000 سے زائد گرفتار
پشاور(بولونیوز)خیبر پختونخوا حکومت کے احکامات کے تحت صوبے میں مقیم غیر قانونی غیر ملکی باشندوں کے خلاف خصوصی کریک ڈاؤن جاری ہے۔ اس کارروائی میں اب تک ایک ہزار سے زائد غیر قانونی افغان باشندوں کو گرفتار کیا جا چکا ہے۔
پولیس حکام کے مطابق یہ کارروائی حالیہ پاک افغان سرحدی جھڑپوں کے بعد شروع کی گئی، تاکہ صوبے میں امن و امان کو یقینی بنایا جا سکے اور غیر قانونی مقیم افراد کی نگرانی کی جا سکے۔
گرفتار افراد کو متعلقہ محکموں کے حوالے کیا جا رہا ہے جبکہ ان کے قانونی اقدامات کے لیے مزید چھان بین جاری ہے۔ حکام کا کہنا ہے کہ کریک ڈاؤن کے دوران کسی بھی غیر قانونی سرگرمی کی بھرپور نگرانی کی جا رہی ہے اور صوبے میں قانون کی حکمرانی کو مضبوط بنانے کے لیے یہ کارروائی مسلسل جاری رہے گی۔
پولیس اور انتظامیہ نے شہریوں سے اپیل کی ہے کہ غیر قانونی مقیم افراد کے بارے میں معلومات فوری طور پر متعلقہ تھانے یا ہیلپ لائن پر فراہم کریں۔
