بلوچستان میں سیکیورٹی فورسز کا آپریشن، 19 دہشت گرد ہلاک، 11 اہلکار شہید
کوئٹہ(بولونیوز)بلوچستان میں سیکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے 19 دہشت گردوں کو ہلاک کر دیا، جبکہ آپریشن کے دوران 11 سیکیورٹی اہلکار شہید ہوگئے۔
سیکیورٹی ذرائع کے مطابق یہ آپریشن این-25 شاہراہ پر جھاؤ کراس اور کرارو کے درمیان کیا گیا، جہاں دہشت گرد مبینہ طور پر مسافروں اور مقامی شہریوں سے بھتہ وصول کرنے میں مصروف تھے۔ کارروائی کے دوران متعدد دہشت گرد زخمی بھی ہوئے۔
ذرائع کا کہنا ہے کہ فورسز نے مؤثر کارروائی کرتے ہوئے دہشت گردوں کے ٹھکانوں کو نشانہ بنایا، جبکہ علاقے میں کلیئرنس آپریشن بھی جاری رہا۔
سیکیورٹی ذرائع کے مطابق عوام کی جان و مال اور قومی شاہراہوں کا تحفظ ہر صورت یقینی بنایا جائے گا، جبکہ بلوچستان کے امن کو سبوتاژ کرنے کی ہر کوشش کا بھرپور جواب دیا جائے گا۔
