سنجاوی روڈ پر رابطہ پل دھماکے سے تباہ، آمدورفت معطل

ہرنائی(بولونیوز)بلوچستان کے ضلع ہرنائی میں سنجاوی روڈ پر واقع طور خام تنگی کے رابطہ پل کو دھماکے سے تباہ کر دیا گیا، جس کے باعث شاہراہ پر ہر قسم کی آمدورفت معطل ہو گئی۔

علاقائی ذرائع کے مطابق نامعلوم مسلح افراد نے پل میں مبینہ طور پر بارودی مواد نصب کیا، جو زوردار دھماکے سے پھٹ گیا۔ دھماکے کے نتیجے میں پل کو شدید نقصان پہنچا۔

واقعے کے بعد ہرنائی سے سنجاوی جانے والی مرکزی شاہراہ ٹریفک کے لیے بند ہو گئی، جس سے مسافروں کو شدید مشکلات کا سامنا کرنا پڑ رہا ہے۔

حکام کے مطابق واقعے کی اطلاع ملتے ہی متعلقہ اداروں نے علاقے کا جائزہ لینا شروع کر دیا ہے، جبکہ دھماکے میں ملوث عناصر کی تلاش اور واقعے کی تحقیقات جاری ہیں۔