اسمگلنگ کیلیے بنائی گئی خصوصی گاڑی ڈرامائی انداز میں پکڑی گئی
کویت(بولونیوز) سگریٹ کی اسمگلنگ کرنے کے لیے خاص طور پر تیار کی گئی گاڑی کسٹمز افسران کو بے وقوف نہ بنا سکی، کروڑوں مالیت کا مال پکڑا گیا۔
کویت کے نوائیصیب پورٹ سے سگریٹ اسمگل کرنے کی بڑی کوشش ناکام بنا دی گئی، عملے نے اسمگلنگ کی بنائی گئی مخصوص گاڑی کے ساتھ 481 کارٹن سگریٹ کو بھی قبضے میں لے لیا۔
کسٹمز حکام کے مطابق بندرگاہ سے باہر جانے والی ایک گاڑی پر اہلکاروں کو شبہ ہوا، جس کے بعد اسے معمول کے مطابق تلاشی کے لیے روکا گیا۔ تلاشی کے دوران گاڑی کے مختلف حصوں میں انتہائی مہارت سے چھپائے گئے سگریٹ کے پیکٹس برآمد ہوئے۔
حکام کا کہنا ہے کہ سگریٹ کے پیکٹوں کی بڑی تعداد گاڑی کے اندرونی پینل، دروازوں، پچھلی نشستوں، فرش، چھت، ایئر کنڈیشننگ ڈکٹوں اور حتیٰ کہ اسپئیر ٹائر رکھنے کی جگہ میں بھی چھپائے گئے تھے، جس سے ظاہر ہوتا ہے کہ گاڑی کو اسمگلنگ کے مقصد کے لیے خصوصی طور پر تیار کیا گیا تھا۔
کسٹمز حکام کے مطابق سامان چھپانے کا یہ طریقہ انتہائی منظم منصوبہ بندی کا حصہ تھا، جس کا مقصد غیر قانونی کھیپ کو سرحد پار کرتے ہوئے قانون نافذ کرنے والے اداروں کی نظروں سے بچانا تھا۔
واقعے کے بعد قانونی کارروائی شروع کر دی گئی ہے، ضبطی کی رپورٹ تیار کرکے مقدمہ محکمہ فوجداری تحقیقات کے حوالے کر دیا گیا ہے تاکہ اسمگلنگ نیٹ ورک میں ملوث افراد کی نشاندہی کرکے ان کے خلاف قانونی کارروائی عمل میں لائی جا سکے-
