مسجد الحرام میں غسلِ کعبہ کی روح پرور سالانہ تقریب منعقد
مکہ مکرمہ(بولونیوز)مسجد الحرام میں غسلِ کعبہ کی روح پرور اور بابرکت سالانہ تقریب منعقد ہوئی، جس کے دوران ہزاروں لیٹر عرقِ گلاب اور آبِ زمزم استعمال کیا گیا۔ اس موقع پر خانہ کعبہ کو مخصوص خوشبوؤں اور آبِ زمزم سے غسل دیا گیا، جس سے پورا ماحول معطر اور روحانیت سے بھر گیا۔
تقریب میں مختلف اسلامی ممالک کے سفارت کاروں، او آئی سی کے نمائندوں، ممتاز علما، مشائخ اور دیگر اہم شخصیات نے شرکت کی۔ شرکا نے اس مقدس موقع پر خصوصی دعائیں کیں اور عالمِ اسلام کے امن و سلامتی کے لیے مناجات کی۔
غسلِ کعبہ کے دوران مسجد الحرام میں سکیورٹی کے خصوصی اور سخت انتظامات کیے گئے تھے، جبکہ نظم و ضبط برقرار رکھنے کے لیے زائرین کی محدود تعداد کو طواف کی اجازت دی گئی۔ انتظامیہ کے مطابق تمام مراحل نہایت وقار اور احتیاط کے ساتھ مکمل کیے گئے۔
