ایرانی حملوں سے کویت انٹرنیشنل ایئرپورٹ کی تنصیبات کو شدید نقصان، ایمرجنسی نافذ

کویت(بولونیوز)ایرانی میزائل اور ڈرون حملوں کے بعد کویت کے کویت انٹرنیشنل ایئرپورٹ پر ہنگامی حالت نافذ کر دی گئی ہے، جبکہ تنصیبات کو شدید نقصان پہنچنے اور زخمیوں کی اطلاعات موصول ہوئی ہیں۔

کویتی وزارت دفاع نے اپنے بیان میں کہا ہے کہ فضائی دفاعی نظام نے رات گئے دشمن کے میزائل اور ڈرون حملوں کو ناکام بنا دیا۔ وزارت کے مطابق تمام میزائل اور ڈرون فضا میں ہی کامیابی سے تباہ کر دیے گئے، جبکہ سنے گئے زوردار دھماکے دفاعی نظام کی کارروائی کا نتیجہ تھے۔

دوسری جانب کویتی سول ایوی ایشن اتھارٹی نے تصدیق کی ہے کہ ایرانی حملوں کے بعد کویت انٹرنیشنل ایئرپورٹ پر ایمرجنسی نافذ کر دی گئی ہے۔ اتھارٹی کے مطابق حملے کے نتیجے میں ایئرپورٹ کی متعدد تنصیبات کو شدید نقصان پہنچا ہے، جبکہ بعض افراد کے زخمی ہونے کی بھی اطلاعات ہیں۔

ایئرپورٹ انتظامیہ کا کہنا ہے کہ حفاظتی اقدامات کے تحت تمام پروازیں اگلے نوٹس تک معطل کر دی گئی ہیں اور فضائی ٹریفک کو دیگر ایئرپورٹس کی جانب موڑا جا رہا ہے۔ صورتحال کے پیش نظر سیکیورٹی مزید سخت کر دی گئی ہے اور نقصانات کا تخمینہ لگانے کا عمل جاری ہے۔