Category: پاکستان

حاصل پور(بولونیوز)حاصل پور شہر میں مبینہ طور پر معاشی مشکلات سے دلبرداشتہ ایک میاں بیوی نے اپنے دو کمسن بچوں کو زہر دینے کے بعد خود بھی زہریلی چیز پی کر زندگی کا خاتمہ کر لیا۔ ذرائع کے مطابق خاندان کرائے کے مکان میں رہائش پذیر تھا اور گزشتہ تین ماہ سے بے روزگاری کے باعث کرایہ ادا نہیں کر سکا تھا۔

ذرائع کا کہنا ہے کہ مکان مالک نے گھر خالی کرنے کا کہا تھا، جبکہ بجلی کے بقایاجات کی مد میں تقریباً 17 ہزار 500 روپے کا بل بھی موصول ہوا، جس کے بعد بجلی کا میٹر بھی اتار لیا گیا تھا۔ بتایا جاتا ہے کہ واقعے سے قبل بچوں نے دودھ لانے کی خواہش ظاہر کی، جس کے بعد یہ افسوسناک سانحہ پیش آیا۔

پولیس نے واقعے کی اطلاع ملنے پر موقع پر پہنچ کر لاشیں تحویل میں لے لیں اور مزید قانونی کارروائی کا آغاز کر دیا ہے۔ حکام کا کہنا ہے کہ واقعے کی تمام پہلوؤں سے تحقیقات کی جا رہی ہیں اور حتمی حقائق تفتیش مکمل ہونے کے بعد ہی سامنے آئیں گے۔

کراچی(بولونیوز) ناظم آباد نمبر 5 میں مبینہ طور پر غیر قانونی پورشن کی تعمیر کا سلسلہ جاری ہے، جہاں مقامی افراد کے مطابق زیرِ تعمیر عمارت پر تیسرے فلور کی تعمیر تیزی سے جاری ہے۔ شہریوں کا کہنا ہے کہ عمارت کے پچھلے حصے میں بھی اضافی تعمیرات اور نئے کالم ڈالنے کا کام مکمل کیا جا چکا ہے۔

علاقہ مکینوں نے متعلقہ اداروں سے مطالبہ کیا ہے کہ اگر مذکورہ تعمیرات قواعد و ضوابط کے مطابق ہیں تو اس کی وضاحت کی جائے، جبکہ خلافِ قانون تعمیرات کی صورت میں فوری کارروائی عمل میں لائی جائے۔ شہریوں نے مطالبہ کیا ہے کہ ذمہ دار حکام موقع پر پہنچ کر عمارت کا معائنہ کریں، تعمیرات کی قانونی حیثیت واضح کریں اور اگر کسی قسم کی خلاف ورزی سامنے آئے تو قانون کے مطابق کارروائی کی جائے۔

اسلام آباد(بولونیوز)چک شہزاد میں واقع سابق صدراورآرمی چیف جنرل پرویزمشرف کامحل نما فارم ہاؤس ایک وقت میں ان کی ریٹا ئرمنٹ کے بعد شاہانہ زندگی گزارنے کے خواب کی علامت سمجھا جاتا تھا۔ بتایا جاتا ہے کہ اس فارم ہاؤس میں بم پروف دیواریں، سوئمنگ پول، وسیع و عریض باغات، جاگنگ ٹریک، قیمتی لکڑی سے تیار کردہ اندرونی آرائش اور اندرونی نقل و حرکت کے لیے خصوصی ٹرانسپورٹ سسٹم سمیت جدید سہولیات موجود تھیں۔

یہ فارم ہاؤس اپنی تعمیر اور سہولیات کے باعث ایک چھوٹی سی ریاست کا منظر پیش کرتا تھا، تاہم حالات نے ایسا رخ اختیار کیا کہ جنرل پرویز مشرف اپنی خواہش کے مطابق یہاں طویل عرصہ سکون سے زندگی نہ گزار سکے۔ ان کی ریٹائرمنٹ سے متعلق یہ خواب حقیقت کا روپ نہ دھار سکا اور یہ رہائش گاہ ان کے ادھورے منصوبوں کی علامت بن کر رہ گئی۔

کراچی(بولونیوز)امریکی صدر ڈونلڈ ٹرمپ کی جانب سے ایران کے ساتھ جنگ بندی ختم کرنے کے اعلان کے بعد پاکستان اسٹاک ایکسچینج میں شدید مندی دیکھی گئی۔

مارکیٹ کے دوران پاکستان اسٹاک ایکسچینج کا 100 انڈیکس 6,713 پوائنٹس کی کمی کے بعد 179,542 پوائنٹس کی سطح پر آ گیا، جس کے باعث سرمایہ کاروں میں تشویش کی لہر دوڑ گئی۔

دوسری جانب عالمی منڈی میں خام تیل کی قیمتوں میں بھی نمایاں اضافہ ریکارڈ کیا گیا۔ برینٹ کروڈ کی قیمت 6 فیصد اضافے کے بعد 78.82 ڈالر فی بیرل جبکہ ڈبلیو ٹی آئی خام تیل 74.96 ڈالر فی بیرل تک پہنچ گیا۔

ماہرین کے مطابق مشرقِ وسطیٰ میں بڑھتی ہوئی کشیدگی اور جغرافیائی سیاسی صورتحال کے باعث عالمی مالیاتی منڈیوں اور توانائی کی قیمتوں پر دباؤ بڑھ گیا ہے۔

کراچی(بولونیوز)شارجہ سے کراچی آنے والے نجی کمپنی کے ٹو ایئرویز کے لاپتا کارگو طیارے کا ملبہ پاک بحریہ اور پاکستان میری ٹائم سیکیورٹی ایجنسی (PMSA) نے تلاش کر لیا ہے۔

حکام کے مطابق طیارے کی تلاش کے لیے پاک بحریہ اور پی ایم ایس اے نے 12 گھنٹے سے زائد عرصے تک سرچ آپریشن جاری رکھا، جس کے بعد طیارے کا ملبہ اوڑمارہ کے ساحل سے تقریباً 53 ناٹیکل میل جنوب میں سمندر سے برآمد کیا گیا۔

ذرائع کے مطابق مزید شواہد اور عملے کے ارکان کی تلاش کے لیے سمندر میں ریسکیو اور سرچ آپریشن تاحال جاری ہے۔

واضح رہے کہ شارجہ سے کراچی آنے والا کے ٹو ایئرویز کا کارگو طیارہ گزشتہ رات لاپتا ہو گیا تھا، جس میں پائلٹ سمیت عملے کے پانچ افراد سوار تھے۔

کوئٹہ(بولونیوز)بلوچستان میں سیکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے 19 دہشت گردوں کو ہلاک کر دیا، جبکہ آپریشن کے دوران 11 سیکیورٹی اہلکار شہید ہوگئے۔

سیکیورٹی ذرائع کے مطابق یہ آپریشن این-25 شاہراہ پر جھاؤ کراس اور کرارو کے درمیان کیا گیا، جہاں دہشت گرد مبینہ طور پر مسافروں اور مقامی شہریوں سے بھتہ وصول کرنے میں مصروف تھے۔ کارروائی کے دوران متعدد دہشت گرد زخمی بھی ہوئے۔

ذرائع کا کہنا ہے کہ فورسز نے مؤثر کارروائی کرتے ہوئے دہشت گردوں کے ٹھکانوں کو نشانہ بنایا، جبکہ علاقے میں کلیئرنس آپریشن بھی جاری رہا۔

سیکیورٹی ذرائع کے مطابق عوام کی جان و مال اور قومی شاہراہوں کا تحفظ ہر صورت یقینی بنایا جائے گا، جبکہ بلوچستان کے امن کو سبوتاژ کرنے کی ہر کوشش کا بھرپور جواب دیا جائے گا۔

راولپنڈی(بولونیوز)ڈی جی آئی ایس پی آر نے بلوچستان کی سیکیورٹی صورتحال پر پریس بریفنگ کے دوران بتایا کہ گزشتہ تین روز کے دوران سیکیورٹی فورسز کی مختلف کارروائیوں میں 54 دہشت گرد ہلاک کیے گئے، جبکہ دہشت گردوں کے متعدد حملے ناکام بنا دیے گئے۔

انہوں نے کہا کہ سیکیورٹی پر مامور ایک پولیس چوکی پر دہشت گردوں کے حملے میں 9 پولیس اہلکار شہید ہوئے، جبکہ جوابی کارروائی میں 15 حملہ آور مارے گئے۔ اس کے علاوہ ایک اور حملے میں سول آبادی کو نشانہ بنایا گیا، جس کے نتیجے میں 4 شہری شہید اور 6 افراد زخمی ہوئے۔

ڈی جی آئی ایس پی آر نے کہا کہ دہشت گردوں، ان کے سہولت کاروں اور ہینڈلرز کا ہر سطح پر تعاقب کیا جائے گا اور دہشت گردی کے خلاف جاری جنگ کو ہر صورت منطقی انجام تک پہنچایا جائے گا۔ انہوں نے اس عزم کا اعادہ کیا کہ ملک سے دہشت گردی کے مکمل خاتمے کے لیے کارروائیاں بلا تعطل جاری رہیں گی۔

لاہور(بولونیوز)لاہور کے علاقے ریس کورس میں وی وی آئی پی موومنٹ کے دوران ایڈووکیٹ علی رضا پر مبینہ تشدد کے الزام میں ایک نامزد ٹریفک وارڈن اور دو نامعلوم اہلکاروں کے خلاف مقدمہ درج کر لیا گیا۔

ایف آئی آر کے مطابق ایڈووکیٹ علی رضا اپنی اہلیہ اور 11 سالہ بیٹے کے ہمراہ اپر مال روڈ پر جا رہے تھے کہ غوثیہ مسجد کے سامنے ٹریفک وارڈنز نے ان کی گاڑی کو زبردستی روک لیا۔ مقدمے میں الزام عائد کیا گیا ہے کہ ٹریفک وارڈن عقیل شعیب نے گاڑی کے شیشے پر مکا مارا۔

ایف آئی آر میں مزید کہا گیا ہے کہ جیسے ہی ایڈووکیٹ علی رضا گاڑی سے باہر نکلے تو ٹریفک وارڈن عقیل شعیب اور دو نامعلوم اہلکاروں نے مبینہ طور پر انہیں تشدد کا نشانہ بنایا، جس کے نتیجے میں ان کی وکالتی یونیفارم پھٹ گئی اور ہاتھ زخمی ہو گیا۔

مدعی کے مطابق موقع پر موجود شہریوں نے مداخلت کر کے معاملہ ختم کرایا، جس کے بعد وہ اپنی فیملی کے ہمراہ وہاں سے روانہ ہو گئے۔

پولیس نے ایڈووکیٹ علی رضا کی مدعیت میں تھانہ ریس کورس میں ٹریفک وارڈن عقیل شعیب اور دو نامعلوم اہلکاروں کے خلاف اختیارات سے تجاوز سمیت متعلقہ دفعات کے تحت مقدمہ درج کر کے مزید تفتیش شروع کر دی ہے۔

کراچی(بولونیوز)سی پی ایل سی نے کراچی میں جون 2026 کے دوران ہونے والے جرائم کے اعدادوشمار جاری کر دیے، جن کے مطابق شہر میں اسٹریٹ کرائم اور موٹر سائیکل چوری کے واقعات بدستور شہریوں کے لیے بڑا چیلنج بنے ہوئے ہیں۔

رپورٹ کے مطابق جون کے دوران شہر بھر سے موبائل فون چھیننے کے 1,689 واقعات رپورٹ ہوئے، یعنی روزانہ اوسطاً 56 سے زائد شہری موبائل فون سے محروم ہوئے۔ اسی عرصے میں 2,419 موٹر سائیکلیں چوری ہوئیں، جبکہ 374 موٹر سائیکلیں اسلحے کے زور پر چھین لی گئیں، جس کے مطابق روزانہ اوسطاً 80 سے زائد موٹر سائیکلیں چوری ہونے کا انکشاف ہوا۔

سی پی ایل سی کے اعدادوشمار کے مطابق جون میں 101 گاڑیاں چوری اور 8 گاڑیاں چھیننے کے واقعات بھی رپورٹ ہوئے، جبکہ قتل کے 40 مقدمات درج کیے گئے۔

رپورٹ میں بتایا گیا کہ جون کے دوران بھتہ خوری کے 9 مقدمات سامنے آئے، جبکہ اغوا برائے تاوان اور بینک ڈکیتی کا کوئی واقعہ رپورٹ نہیں ہوا۔

سی پی ایل سی کے مطابق کراچی میں شہریوں سے لوٹ مار، موبائل فون اور موٹر سائیکل چوری کی وارداتوں میں اضافہ تشویش کا باعث ہے، جس سے اسٹریٹ کرائم پر مؤثر قابو پانے کی ضرورت مزید اجاگر ہو گئی ہے۔

کراچی(بولونیوز)میئر کراچی بیرسٹر مرتضیٰ وہاب نے بلدیہ عظمیٰ کراچی کے ریٹائر ملازمین کا دیرینہ مسئلہ حل کرتے ہوئے پنشن بقایاجات کے چیکس تقسیم کر دیے۔ اس سلسلے میں بلدیہ عظمیٰ کراچی کے مرکزی دفتر میں تقریب منعقد ہوئی۔

تقریب میں ڈپٹی میئر کراچی سلمان عبداللہ مراد، میونسپل کمشنر ابرار جعفر اور دیگر اعلیٰ افسران بھی موجود تھے۔ میئر کراچی نے ریٹائر ملازمین میں 38 کروڑ روپے سے زائد مالیت کے پنشن بقایاجات کے چیکس تقسیم کیے۔

اس موقع پر بیرسٹر مرتضیٰ وہاب نے کہا کہ یہ تمام مسائل انہیں ورثے میں ملے، تاہم پاکستان پیپلز پارٹی کی شہری حکومت ریٹائر ملازمین کے مسائل ترجیحی بنیادوں پر حل کر رہی ہے۔ انہوں نے بتایا کہ جب موجودہ انتظامیہ نے ذمہ داریاں سنبھالیں تو تقریباً 11 ارب روپے کے واجبات ادا کرنا باقی تھے، جن میں سے اب تک 6 ارب روپے سے زائد کے واجبات ادا کیے جا چکے ہیں۔

میئر کراچی کا کہنا تھا کہ عوام دوست پالیسیوں کے باعث آج ملازمین کو ان کے جائز واجبات ادا کیے جا رہے ہیں، جو پاکستان پیپلز پارٹی کے چیئرمین بلاول بھٹو زرداری کے وژن کا حصہ ہے۔