مبینہ معاشی تنگی سے دلبرداشتہ میاں بیوی نے دو بچوں سمیت زندگی کا خاتمہ کر لیا

حاصل پور(بولونیوز)حاصل پور شہر میں مبینہ طور پر معاشی مشکلات سے دلبرداشتہ ایک میاں بیوی نے اپنے دو کمسن بچوں کو زہر دینے کے بعد خود بھی زہریلی چیز پی کر زندگی کا خاتمہ کر لیا۔ ذرائع کے مطابق خاندان کرائے کے مکان میں رہائش پذیر تھا اور گزشتہ تین ماہ سے بے روزگاری کے باعث کرایہ ادا نہیں کر سکا تھا۔

ذرائع کا کہنا ہے کہ مکان مالک نے گھر خالی کرنے کا کہا تھا، جبکہ بجلی کے بقایاجات کی مد میں تقریباً 17 ہزار 500 روپے کا بل بھی موصول ہوا، جس کے بعد بجلی کا میٹر بھی اتار لیا گیا تھا۔ بتایا جاتا ہے کہ واقعے سے قبل بچوں نے دودھ لانے کی خواہش ظاہر کی، جس کے بعد یہ افسوسناک سانحہ پیش آیا۔

پولیس نے واقعے کی اطلاع ملنے پر موقع پر پہنچ کر لاشیں تحویل میں لے لیں اور مزید قانونی کارروائی کا آغاز کر دیا ہے۔ حکام کا کہنا ہے کہ واقعے کی تمام پہلوؤں سے تحقیقات کی جا رہی ہیں اور حتمی حقائق تفتیش مکمل ہونے کے بعد ہی سامنے آئیں گے۔